Shillong, Nohprah 12 : Ki nongïalam ka NPP ha Mawlai Constituency kin ïa kynduh lang ha kine ki khyndiat sngi ban ïa kren sani bad ïa syllok lang na bynta ka elekshon MDC kaba lah ban sa long noh ha u bnai Rymphang – Lber mynta u snem.
Ka bynta kaba hakhmat eh jong ka jingïakren ka dei eh hadien ba u MDC ka thaiñ ba dei na ka NPP hi, Bah Teibor Pathaw u la pynpaw ba u la sngew artatien ban aireng biang ha kane ka elekshon MDC hadien ba u ïohi ba ki paidbah ka Mawlai ki la jubab da khongpong ïa u ha ka elekshon MLA ha u 2023 bad kumjuh ha ka elekshon MP.
Haba kren bad u Mawphor, uwei na ki nongïalam ka NPP u la ong, “Ngi la dep ban ïakren bad ki nongïalam halor kane ka bynta bad ngi khmih lynti ba ha kine ki khyndiat sngi ngin sa lah ban shim ïa ka rai.”
Shuh shuh u la ïathuh ba hadien ba u Bah Teibor u la dep ban pynpaw ha ki lad pathai khubor ba u la artatien ban aireng biang, ki paidbah na kylleng ki bynta jong ka Mawlai constituency ki la bynñiaw lut. “Mynta ki la pei shkor lut uba kumno u nongmihkhmat ki donkam khamtam na bynta u duk u suk bad kiba pang ba shitom,” u la ong.
Katkum ka jingïathuh jong u, ka jingïalang kaban long ha kine ki khyndiat sngi kan dei ruh ka sngi kaba ki hap ban ïatai bad syllok biang ïa u Bah Teibor.
“Na ka kaiphod kaba ngi ïoh, la pyntip shangi ba ki paidbah nongthep vote ka Mawlai mynta ki la sdang ban ïaroh bad ai burom ïa u Bah Teibor na bynta kiba bun ki kam pynroi kiba u la lah ban wanrah watla u dei tang u MDC ha kine ki 5 snem tam kum u MDC bad kum u Executive Member ka KHADC. Kumta, da kaba ïaid katkum ka kaiphod kaba ngi ïoh, ngi sngewskhem ba kane kadei ka kabu ksiar kaba ki paidbah kin ai ka jingsngewnguh na bynta ki kam ba bha kaba u la leh,” u la bynrap biang.
La sngewthuh ruh ba haduh mynta hi, kim pat tip kaei ka jingmut jong u Bah Teibor hynrei na ka liang ki nongïalam ki ieng skhem beit ba lada long kumno kumno ruh kin ym ailad ba un kynran dien noh hynrei ban pynskhem beit ia u Bah Teibor.
Dang shen, u Working President ka NPP, Bah Hamlet Dohling u la ïathuh ba ki don haduh lai ngut kiba pan tiket na Mawlai na bynta kane ka elekshon MDC. U la ïathuh ruh ba ïa ka thup kyrteng kaba ar na bynta ki kyrtong kin sa pynbna noh ha shwa ka Khristmas.
Hynrei katkum ki khubor ba la ïoh na ka liang ki nongkyrshan ryngkat ki nongïalam ka NPP Mawlai ki la ieng skhem triang ba ha ka jingialang rai kyrtong kaban sa long shen kin ym ailad ba u Bah Teibor ba un kynran dien noh.
