Shillong, Rymphang 03 : Uwei u rangbah ba ju tam mar jot ha ka jaka thehñiut ha Marten ba tip kyrteng kum u Bah Marshal Marweiñ ha ka sngi Saitjaiñ u la shah tap ha kitei ki jaboh ba don ha katei ka jaka katba u dang leit ban tam marjot.
Watla utei u rangbah u la hap naduh ka por shiteng sngi, hynrei la ong ba ka jingwad ïa u da kaba pyndonkam da ki puh shilum ka dang ïai bteng wat haduh ynda kem dum ruh.
Ki para ba tam mar jot ha katei ka jaka la ong ba tang shu ïohi ïa kane mar mar ki la pyntip sha ki bor pynïaid jong ka Marten ban ai jingïarap hynrei ym shym la lap satïa ïa u.
Mar ïa ïoh jingtip halor kane, na ka lïang ki Pulit ka Mawlai Police Station ruh mar mar kila phah ïa ki briew sha Marten ban ïarap wad lem ïa une u rangbah.
Hynrei tad haduh ba thoh ïa ka khubor, kata wat hadien 8 kynta ruh pat lap dak ei ei ban lap ïa ka met jong utei u rangbah.
Kitei ki nongwad ki la pynpaw ba ka jingeh ban lap ïa utei u rangbah kadei namarba u ñiut ba lum thup u dei uba la bun bad ba ka tdem ding ruh ka jur kumta ka shem shitom haduh katta katta
Utei u rangbah u dei uba shong ba sah ha Mawiong ad uba ju bud ïa ki kali kit niut jong ka Municipal hynrei ha ki por ba u lait u ju leit ban tam ïa ki mar jot ha katei ka jaka ryngkat ki bahaiing jong u.
Na ka lïang kito kiba ju tam mar jot ha katei ka jaka ki la ïathuh ruh ba kane kadei ka sien kaba nyngkong ba kan jïa kum kane bad ki la pynpaw ba ka jingwad ruh ka dei kaba shem shitom bha nalor ba la kem dum bad kawei ruh ba ka jaka ba ju theh ïa ki jaboh bad ki ñiut ka long kaba shong kynrong bad synjor bad kam long satïa kaba shngaiñ.
