Twa ka surok ba donkam bha ha Baghmara
![](https://mawphor.com/wp-content/uploads/2022/05/mawphor-1-2.jpg)
Shillong Naitung 03: Ka surok kaba donkam bha ha Baghmara kaba dei ruh tang kane kawei ka surok ban leit sha Siju, Rongara bad Nangalbira ka la twa na ka jingther u lapbah uba jur bha ha ka mied jong ka sngi Baar.
Ka khubor ba la ïoh la ïathuh baroh kawei ka surok kaba don halor jong ka Baghmara Municipal Board ka la twa ha ka por mynmied na ka jingther u lapbah lapsan bad kane ka jingtwa ka la pyndkoh ïa ka leit ka wan jong ki paidbah ban leit sha East Garo Hills bad sha South West Khasi Hills, lyngba ka thaiñ Rongara.
Shuh shuh la ong ba ki kali kin ym lah ruh ban leit sha ka ophis jong u Deputy Commissioner lyngba ka shnong Baghmara hadien ba ka bynta jong katei ka surok ka la twa noh ha katei ka sngi.
Katkum ka jingïathuh ki trai shnong ki la ong, ba katei ka jingtwa kadei namar ba ym shym don kiba la khmih ne peit ïa ka jinglong jingman jong katei ka surok bad khamtam haba ym shym la shna ïa kino kino ki kynroh bad ka jingmih jong ki jingtei ha ki bynta jong katei ka surok kadei ruh shi bynta ban nang pynjur ïa katei ka jingjulor.
Ka Garo Hills ka la ïai mad ïa ka jingbteng ban slap jur bha ha kine ki shi taïew kiba la dep ha kaba ka la lam sha ka jingtwa khyndew, ka jingshah pynjulor ki ïing bad ka jingshlei um.
Hadien jong katei ka jingtwa ka surok ha Baghmara, ki nongleit nongwan kila hap ban pynïeng noh ïa ki kali ki jongki ha ka bynta jongka thaiñ ba wan na Siju bad kila hap ban ïaid noh da ka kjat lyngba ka lad ha Baghmara Circuit House ban mih lyngba sha ka New Bazar kaba don ka ophis treikam jong ka Municipal Board.