Nongstoiñ, Nailur 29: Ki katto katne ki samla ka thaiñ Nongstoiñ ki la tur sha dc ophis Nongstoiñ hynne ka sngi ryngkat ki placard, ban pynpaw ka jingpyrshah halor ka jingbym pynkynriah jong u Deputy Commissioner ka West Khasi Hills, ïa ka tarik ba la hukum ban pynkhuid ïa ka Wah Nonbah bad Ïew Nongstoiñ ha ka sngi u Blei ka 1 tarik Risaw. Kane ka kynhun ki samla ka la leit tur sha ophis u DC ha ryngkat ki jingpyrta ban pyndam ïa katei ka hukum.
Hadien katto katne jong ka jingïa pyrta pynrem jong ki samla ïa katei ka hukum, u DC u la khot ïakren ïa ki katto katne ki samla shapoh ka ophis treikam ka jong ban ïakren, ban pynshai halor katei ka hukum kaba u la pynmih kaba la ktah bad pynsngew mong ïa kiba bun ki kynhun Seng hapoh ka District.
U bah D.Sun uwei na ki samla rangbah ha katei ka kynhun, haba ïakren sha ki lad pathai khubor hadien ba la mih na ka kamra u DC, u la ong ba na ka liang jong u DC u la pynshai sha ki ba um lah ban ai hukum thymmai ban pynkynriah ïa katei ka prokram. Hynrei u la ong pat ba kam don kano kano ka jingpynbor bad ka nym don ruh kano kano ka jingpynshitom ïa ki bym treh ban wan ïashim bynta ha katei ka sngi.
