Shillong, Lber, 11: Ki dkhot ka Khasi Students’ Union (KSU) ha ka sngi Baar ki la tur sha Iingdorbar Thawaiñ ban pyrshah ïa ka jingtyrwa ka Sorkar ban mynjur ïa ka jingpynbeit thymmai ïa ka Meghalaya State Investment Promotion and Facilitation Bill, 2025 bad ban wanrah ïa ka lynti rel ha rilum Khasi bad Jaiñtia.
Da kaba rah ïa ki lama, ki banner bad ki jingthoh pyrshah, ki dkhot ka KSU ki la pyrta shla ruh ïa ka sur ba pynrem ïa ka MSIPFA bad ka sur ba pyrshah ïa ka lynti rel.
Ki dkhot ka KSU ki la shah pakhang lynti shwa ban poi sha Assembly.
Ka KSU ka la dawa ïa ka Sorkar ban pyndam noh mardor ïa ka jingpynbeit thymmai ïa ka MSIPFA da kaba kam ba ka jingwanrah ïa ka jingpynbeit thymmai ka plie lad ïa ki Private Sector ban thied jaka laitluid, kaba long pyrshah ïa ka jingthmu jong ka Meghalaya Land Transfer Act.
Ka KSU ka la pynpaw ruh ïa ka jingpyrshah halor ka jingthmu jong ka Sorkar ban wanrah ïa ka lynri Rel na ka daw ka jingbym don ïa ki aiñ kiba khanglad ïa ka jingwan rung kyrthep jong ki mynder ri bad ki briew kiba nabar ka jylla.
Tang ha ka por janmiet, u Myntri Rangbah ka Jylla u Conrad K. Sangma u la khot ïakren ïa ki nongïalam jong ka KSU ha kamra treikam jong u ha Secretariat.
Ha ka jingïakren bad ki lad pathai khubor, u President ka KSU, samla Lambokstawell Marngar hadien ka jingïakynduh ïa u Myntri Rangbah ula ong, “ka seng kam hun bad kam lah ban pdiang ïa ki jingpynbeit thymmai ha ka aiñ MSIPFA, 2024. Ka jingïakren ka long kaba ngim sngewhun bad kaba dang dap shibun da ki jingartatien. U Myntri Rangbah u la kubur ïa ki mat ba la ai jingmut jingmut ba ngi la ai jingthoh naduh u bnai Kyllalyngkot, kaba ngi kwah ban pynbha shwa ïa ka Principal Act namarba ïohi ba ki don shibun ki jingduna kiba dang donkam ban pynbha bad ban pynjanai kaba lehse kan long ka jingriam ïa ka jinglong trai jong ngi ïa ka khyndew ka shyiap bad ïa ka jinglong bakyrpang.”
“Ha ka jingïathir ïatai, ka Sorkar ka la pyni la ki jong ki nia ki jutang, hynrei tang da ka ktien u (Myntri Rangbah) u la ong ba dang donkam shibun ka por ban pdiang ïa ki jingai jingmut jong ngi. Ngi la kren ruh ba ïa kane ka aiñ dang donkam ban pynbha shuh shuh namarba ngim kwah ban kano kano ka aiñ kaba ka Sorkar ka wanrah kin long ki mawjynthud ïa ngi ki trai ri trai muluk,” u la ong.
“Ngi phah ruh ïa u kyrwoh sha baroh ki MLA na ka Bri u Hynñiewtrep lada ki don ka jingkitkhlieh bad kiba kwah ban pynhun ïa ki paidbah kiba la jied bad pynshong shuki, ki dei ban ong tang kawei ka kyntien, donkam ban pynsangeh shwa, namarba ngi dang donkam ïa ka jingïathir ïatai,” la bynrap u President ka KSU.
U la ïathuh ruh ba u Myntri Rangbah u la ong ba un sa khot ïa ki kynhun bapher bapher, ïa ka synjuk ki nongsynshar shnong ban ïathir bad ban ai jingmut. “Hynrei ha ka por ba ki shna ïa kane ka aiñ balei kim pan jingmut ïa baroh ki kynhun. Kata ka pynlong ïa ngi ba ngi ïohi ïa kane ka aiñ kaba dkoh bad kaba dei ban pynjanai. Ka Sorkar haba ka mynjur ïa kane ka aiñ kam shym la khot ïa ki kynhun bapher bapher hynrei ka shu ïaid kumto bad ha ka jingshisha ladei ban buh ha ka rynsan paidbah ba yn dup lah ban ai jingmut ïa ka aiñ ba kan ym ïatakhuh hangne hangtai,” u la ong shuh shuh.
Haba kylli, u la ong ba u Myntri Rangbah u la shu ai ka jingkular da ka ktien ba ka ain MSIPFA kan ym ïaid lait na ka Meghalaya Land Transfer Act. “Kam dei kaba suk ba ngin shaniah. Balei kim pan ka jingïasyllok naduh basdang,” u la bynrap.
U la ong ba ka Sorkar kam lah satia ban shu leh da ka bor hynrei ka hap ruh ban sngap ïa ka sur jong ki paidbah.
U la ïathuh ruh ba ka seng kan sa shong ban pyrkhat halor kane ka aiñ.
U General Secretary ka KSU Donald V. Thabah haba bynrap ula ong, “ngi la pynpaw ruh ha ka dorkhas ba la bsut ïa ki phra tylli ki mat ba ka MSIPFA ka la pynkupbor haduh katta katta ïa ka Governing Council kat haduh ba ka lah ban ïaid lait ïa ki aiñ bapher bapher ba la don lypa.”
U la ïathuh ruh ba ka Sorkar ka la pyntip ba ynda la wanrah ïa ki jingpynbeit thymmai bad ynda la thaw ïa ki Rule kan ïa khot ïakren biang ïa ki kynhun bapher bapher.
“Ngi la ong, ba ngi ïohsngew ïa ka jingkren tang da ka ktien, hynrei katba ngim pat ïohi ïa ki kam ngim pat hun bad ngim pdiang hi ruh ïa ka MSIPFA,” u la ong.
