Tur ka HITO sha MSPCB ban ujor ïa ka jingbishar paidbah jongka Meghatop Cement ha Wahïajer

Shillong, Risaw 22: Ka Hynñiewtrep Integrated Territorial Organisation (HITO) ha ka sngi Ba-ar ka la leit ban tur paidbah sha ka ophis treikam jong ka Meghalaya State Pollution Control Board (MSPCB), Shillong.
Hadien ba ka la ujor, la ong ba kane ka jingïatur paidbah ka dei kum ka dak ban pynpaw ïa ka jingpyrshah halor ka jingjia kaba jia ha ka 18 tarik Risaw, ha ka Public Hearing jong ka Board (MSPCB) ha shnong Wahïajer, East Jaiñtia Hills District.
Ha kaba ïadei bad kane la ong ba kane ka public hearing ka dei kaba la pynlong na ka bynta ban seng ïa ka karkhana dewbilat Meghatop Cement Pvt Ltd ha ka shnong Wahïajer.
Ki kynhun Sengbhalang kynthup naduh ka KSU, FKJGP, HYC bad HITO, kila shah pakhang lynti ha ki volunteer jong ka shnong Wahïajer, ba kin leit ïashimbynta ha ka Public Hearing bad kumjuh ruh ïa baroh ki briew kiba pyrshah ïa ka kompeni Meghatop Cement Pvt Ltd ban seng karkhana.
Ha kaba ïadei bad kane haba kren sha ki lad pathai khubor na ka liang jong u President ka HITO u Bah Donbok Dkhar ula ong ba ka jingïatur paidbah sha ka ophis ka MSPCB ka long eh na ka bynta ban dawa pynlong biang da kawei ïa ka public hearing jong ka Meghatop Cement Pvt Ltd.
Shuh shuh ha kaba ïadei bad kane na ka liang jong une u nongïalam u la ong pyntip ba ka HITO ka la aipor shi taïew ïa ka MSPCP ba kan kheiñ ïap noh ïa ka Public Hearing ba 18 tarik Risaw bad ban pynbeit biang da kaba thymmai.
Shuh shuh halor kane na ka liang ka seng ka la byrngem ruh ba lada ka MSPCB kam leh eiei hapoh kane ka shitaïew ba la aipor, ka HITO ka la pynkhreh ban leit ujor da ka mukotduma sha Ïingkashari Meghalaya High Court.