Nongstoiñ, Nailar 10 : Hadien ka jingujor ki paid nongshong shnong, ka seng KSU Mairang Circle hapoh ka jingïalam u samla Robin N Nongrem general secretary ryngkat u samla Khrawjutang Kharsyntiew lem bad ki dkhot, ki la leit ïakynduh ïa ki nongtrei ka post office Mairang, ha kaba ki nongtrei ki la kubur ba ki don ki jingduna hangne hangtai. Kumta na ka liang ka seng ka la kyntu bad maham ruh ba ki dei ban shimkhia bad pynbeit ïa ki jingduna kiba ktah ïa ki paid nongshong shnong kiba ju shaniah ïa kane ka office treikam.
La ong ba na ka por sha ka por ki jingujor pyrshah ïa kane ka office ki ju wan sha ka seng, khamtam eh kito kiba sah kham pajih na Mairang. Ka seng ka la ban jur ba kum kine ki jingjia, kim dei ban dang bteng namar ka ktah shibun eh ïa kiba sah jngai, khamtam kum ha ki kam sei bad thep ïa ki pisa jong ki.
Ka seng ka kyntu ïa ki paid nongshong shnong ba kin ïatreilang bad ki nongtrei bad sngewthuh lang haba don ki jingeh, kaba ïadei bad ki jingtreikam hapoh ka post office. Ka seng kan buddien ruh khnang ba ki jingkular kin ym dkoh bad kin ïaid beit ïaid ryntih kumba la dep ïa pynbeit, pynkut u kyrwoh na ka seng.
