Tuid da ki hajar ngut sha ka lympung ïalap elekshon jong u James Sangma ha Dadenggre

By Mawphor Editor On Feb 24, 2023

Shillong, Rymphang 23 : Ka lympung ïalap elekshon ha constituency u James P K Sangma, kata ha Dadenggre constituency ka la logn kaba shongshit bha ha kane ka sngi Palei ha kaba da ki hajar ngut ki la poi sha katei ka jingïalang.
Ha katei ka jingïalap elekshon la donlang ruh da u NPP National President bad Myntri Rangbah ka jylla, Conrad K. Sangma ryngkat bad ki heh ka party kynthup ïa ka MP Tura, ka Agatha Sangma.
“Ka jingtuid u paidbah ka pyni ïa ka jingieid bad ka jingkyrshan ba radbah jong ki paidbah na ka bynta ka NPP. Ka jingkiew jong ka Dadenggre ryngkat ka jingïohi jngai jong ka NPP kadei ka dak jong ka lawei ba phyrnai na ka bynta ki paid jongngi. Kadei ka ka khana jong ka jingïakhun na bynta ki paidbah bad kata kadei ka jingtrei ba ka NPP ka mihkhmat – ka jingïohi jngai, ka thong, ka jingtylli bad ka jingkhlaiñ,” ong u James Sangma.
U James uba la jop arsien kum u MLA jong ka thaiñ u la jop bun bha ïa ka elekshon ha u 2018 da kaba pynliem ïa u kyrtong ka TMC ba mynta u Rupa Marak. Kumta da ka jingnang wan pynïasoh ki nongïalam na katei ka kynhun sha ka NPP dang shen ka la ai mynsiem ai u ba un tam kham bun shuh shuh ha kane ka elekshon.
Na ka liang u Conrad pat haba kren halor ka thong treikam jong ka party khamtam eh na ka bynta ka roi ka pa, u la ong ba ka Dadenggre ka la dei ka kut ba skhem jong ka NPP. “Ki paidbah ka constituency ki la pyni ïa ka burom ïa u nongseng jong ka party u (L) PA Sangma uba la trei borbah baroh ka jingim jong u na ka bynta ban kyntiew ïa ka rilum Garo.”
Shuh shuh u ong ruh ba ka lyer jong ka NPP ha Dadenggre ka la dei shi bynta jong ka jingpynbeh ïa ka lyer ha ka jylla baroh kawei ha kaba baroh ki paidbah ki la pdiang ba katei ka party kan sa wan synshar hi da kaba ïoh synshar marwei.
Ha kane ka sngi, la ïoh ruh ka jingkren na ka Soradini K Sangma kaba dei ka kurim jong u nongseng ka party u (L) Purno A Sangma. “Nga la ju ïathuh ïa ki khun jongnga ba kam pher la phi pule shano shano, phi trei kano kano, kano ka jingim phi leh, phim dei ban klet ïa ka rilum Garo. Kumta ki paidbah ki la ai ka jingshaniah ha phi, phim dei ban klet,” ka la ong.
Shwa ban long ka jingïalang ka la don shwa ka rally jong ki kali bad ki kali arshaka bad pynkut lang khrui ha ka jaka ba long ka jingïalang.