Shillong, Ïaïong 06: Ka khubor ba la ïoh na ki pulit la ïathuh ba u Bah Donald Khyriem u la phah ka jingujor ba hapdeng ki mied jong ka 29 & 30, tarik u bnai Lber, 2025, ki runar bym lah ban ithuh ki la prong hapoh ka Officer’s Quarter ha Forest Colony, Polo Hills, Shillong bad ki la tuh ka pisa T. 13,400/- bad kiwei pat ki tiar.
Shuh shuh ha kawei pat ka jingjia u Hirak Jyoti Roy u la phah ka jingujor ba ha ka 27 tarik u bnai Lber, 2025, ki runar bym lah ban ithuh ki la tuh ïa ka laptop jong u na Civil Hospital, Shillong.
Sa kawei pat ka jingjia ki pulit ki la ïathuh ba u Bah Phriar Ryntathiang, Sirdar ka shnong Nongdom (EWKH) u la phah ka jingujor ba ha ka 20 tarik u bnai Lber, 2025 uwei u rangbah ba kyrteng u Phursten Sun ba la 28 snem ka rta u la thang ïa artylli ki khlaw ha Lumpyrtap (EWKH) bad u la phet na kane ka jaka. Hynrei ha ka 1 tarik u Ïaïong ki bor shnong ki la ïoh pat ban bat noh ïa u.
Ki pulit ki la ïathuh ruh ba ka kong B Lakhiat ka la phah ka jingujor ba ha ka 30 tarik u bnai Lber, 2025, ki runar bym lah ban ithuh ki la prong hapoh ka karkhana jong ka kaba Ri-Bhoi District bad ki la tuh kawei ka motor kaba shongdor T. 21,000/-.
