Shillong, Jymmang 28: Ka Sharda Verma ka la phah ka jingujor ba ha ka 26 tarik mynta u bnai ha ka por 4 baje mynstep, uwei u runar bym lah ban ithuh u la prong hapoh ka ïing jong ka kaba ha Laitumkhrah, Shillong bad u la tuh kawei ka bicycle. Ha kaba ïadei bad kane na ka liang ki pulit ki la kem noh ïa uwei u briew uba la ithuh kyrteng u Damanbha Ryngksai ba la 29 snem ka rta.
U Rajiv Deka u la phah ka jingujor ba ha ka 24 tarik mynta u bnai ha ka por kumba 10.28 baje mynstep, uwei u runar bym lah ban ithuh u la prong hapoh ka ïing jong u kaba ha Nongmensong Umkdait, Shillong bad u la tuh ïa 2 tylli ki mobile phone. Ïa kane ka jingjia la ïohi ruh lyngba ka kor CCTV.
U Secretary Shnong, Mawpat Pyllun, Shillong u la phah ka jingujor ba ha ka 26 tarik mynta u bnai ha ka por 7 baje mynstep, ki runar bym lah ban ithuh ki la tuh ïa ki waïar electric ba ki fuse napoh ka water reservoir jong ka shnong ha Mawpat Mawkiang (EKH), ha kaba kane ka la pynthut ïa ka jingsam ïa ka umbam bad kaba wanrah ruh ka jingma ïa ka koit ka khiah jong ki paidbah bad ka jingkhuid jingsuba.
Uwei u nongshong shnong ka South Garo Hills u la phah ka jingujor pyrshah ïa ka Tanera Ch Marak ba ka la thok ïa u ka pisa kumba T. 1.4 lak, da kaba kular ban pynïoh kam sorkar na ka bynta ki khun jong u. Utei uba la ujor u la ïathuh shuh ba kane kaba la shah kynnoh ka la thok ruh ïa kumba 5 ngut kiwei pat ki riew shimet da ka pisa kaba la kot T. 4.45 lak.
