Jowai, Risaw 15: Ka kynhun ïalehkai jong ka Maia Club Umjalasiaw kala long syndon ka lahduh jong ka lympung ‘Joybell Suiam Memorial Trophy Second Division Football League 2025’, ba la pynïaid da ka Thadlaskeiñ Sports Association (TSA), West Jaiñtia Hills hadien ba ka la jop ïa ka jingïakhun final kaba la long ha ka sngi Balang, 15 tarik u Risaw, ha madan Wahiajer Multi-Sports Complex.
Haba ka jingïakhun ïa ka phainal, la ïohi ïa ka Maia Club Umjalasiaw kaba la pynskhem ïa ka nam lahduh da kaba jop 3-1 kol ïaka Bamkamar SC.
Ka jingïalehkai ha ka kylla step ka la ïakhaid da mar kawei (1-1). Ka Maia Club Umjalasiaw ka la pynkhihjar nyngkong lyngba u Gabriel Siangshai ha ka minit kaba 10 shuwa ba u Dlansing Mylliem (36’) un pynïakhaid shi por na bynta ka Bamkamar SC.
Hynrei ka jingïalehkai kaba kyrpang jong u Leimiki Dkhar ha ka kylla miet, da kaba thep ar tylli ki kol (61 & 70’) ka la pynthikna shi syndon ïa ka Maia Club Umjalasiaw ban khur ïa ka nam lahduh.
La ïoh ruh ban sam ïa ki khusnam shimet sha ki rangïalehkai ba kynsai, ha kaba ïa ka nam Best Player la ïoh da u Leimiki Dkhar, Top Scorer da u Leimiki Dkhar, Best Goal Keeper da u Dame Dkhar, bad baroh lai ngut kidei jong ka Maia Club Umjalasiaw.
Ha kane ka sngi la wan Kongsan da u Bah Jesse Suiam, EM ka JHADC, haka jingdon lang u Bah Kmenlang Shylla, President ka TSA, u Bah Mutshwa Thabah-Vice Presiden, kiba la ai ruh ka jingkren ha ka sngi pynhap pyrda noh ïaka 2nd Division Football League.
Nalor kiwei de kiba la wan ban sakhi lang ki long u ma Andriew Sari (Secretary Shnong Wahiajer), u ma Ebormi Lyngdoh (General Secretary TSA), ma Pyrkhat Lamare (Treasural TSA).
Ka kynhun kaba ïoh rah ïa ka nam lahduh ha kane ka lympung kala ïohpdiang ïa ka khusnam pisa kaba T.40 hajar tyngka katba kaba wan ba ar kala ïohpdiang T.20 hajar tyngka.
Baroh kine ki ar kynhun kiba ïakhun ha ka phainal kila dep ban pynthikna ïa ka jaka jong ki ban kiew ha ka 1st Division haka aiom lehkai ka ban wan.
