Shillong, Nailar 13 : U President jong ka People’s Democratic Front (PDF) uba dei ruh u Myntri ha ka sorkar jylla u Bah Banteidor Lyngdoh u la ong ba u la thikna ba un ïeng ïakhun biang na ka PDF ha ka ilekshon jong u snem 2023.
Haba kren sha ki lad pathai khubor, u Bah Banteidor Lyngdoh u la ong ba u nym shet kylla ïa ka party kaba lah ai jingjop ïa u bad kaba la pynpoi ïa u sha ka kyrdan Myntri ha ka sorkar. U la ban ruh ba long katba long un neh beit triang ha ka PDF da kaba ong ruh ba un nang bteng ban trei shitrhem ban pynkhlaiñ ïa ka party na bynta ka ilekshon ban wan.
“Nga lah dep ong, ba ma nga bad u MLA ka Sohra konstitwensi u Bah Gavin Mylliemngap ngin ïakhun ha ka ilekshon u snem 2023 na ka PDF,” La ong u Bah Banteidor Lyngdoh.
U la ong ba kum u President jong ka party un ïaleh katba lah ban pyntikna ba ka party kan pynrung ïa ki kyrtong kiba don jingkyrmen ban jop ha baroh ki konstitwensi khamtam ha East Khasi Hills District.
Haba kylli pat haduh katno ngut ki kyrtong kiba ka PDF kan pynïakhun u Bah Banteidor u la ong ba ka party ka la buh thong 15 haduh 20 ngut ki kyrtong na bynta ka ilekshon 2023.
