Nongstoiñ, Naiwieng 6: Ka Markasa Area Fisheries Association kaba dei ka kynhun jong ki rawon ba khlaiñ Markasa kaba la ïadon bynta lang da ki nongsynshar shnong ban pynneh ïa ki doh um doh wah bad ban khanglad ïa ka jingpynïap pathar kum da kaba ber dawai bih, khang jar, dung proh, siat bom bad kiwei kiwei kiwei.
Katei ka synjuk kaba la ïalam da u bah Y.P.S Syiemlieh kum u President ka dei kaba la seng la slem bha, ka don ïa kawei ka jaka ha ka wah Umnamlang ha kawei ka thwei kaba la tip kum ka thwei Wanïong kaba don ha ka lynti na Nongkasen sha Laitkseh ïa kaba ka la pynlong kum ka jaka ban pynneh bad pynroi ïa ki dohkha.
Naduh ba katei ka Association ka la pynlong ïa katei ka jaka kum ka fish sanctuary, ka la ïoh ruh ïa ka jingïarap na ka sorkar na ka bynta ban shna ïa ka ïing ba u nongpeit ïa katei ka sanctuary un shong un sah, khnang ba kiba thmu ban wan pynïap dusmon ïa ki dohkha ha katei ka thwei kin ym ïoh lad. Harud katei ka thwei la pyrshang ban pynneh pynsah ïa ki dieng bad la thung ruh da ki syntiew kiba itynnad bad ha kine ki sngi haba peit ïa katei ka jaka, lah ban ong ba ka la dei kawei na ki mini park ha katei ka thain.
Ha kine ki khyndiat sngi la lap ba ka Association ka la buh da ka sign board kaba shai bha, ba la thoh ïa ki kyndon ba pyrkhing bha ïa kiba pynïap pathar ïa ki doh um ha katei ka wah. Haba la pyrshang ban bret jingbam ha katei ka wah, la lap ba ki jingbun jong ki dohkha ka la jan ïa ryngkat bad ka Nan Polok, namar na ka jingkynthih jong ki duhkha ka um ka la thnam hi shait.
Haba phai ha ki phew snem kiba la leit noh lajan baroh ki wah ha West Khasi Hills wat la kim dei satia ki wah kiba la pynlong kum ki fish sanctuary, hynrei ki dohkha doh pnat, ki dohthli doh sher, ki shalynnai ki kynrei bad ki bun haduh katta katta. Hynrei, naduh ba ki riew dusmon kiba mlien ban leit ber dawai bih, la jan baroh ki wah hapoh ka District ki la kylla lyngki bad wat ïa ki maw hapoh um la sop satang da u sohpailen suda.
Ka jingduh thylli jong ki wah hapoh ka District ka la jur palat hadien ba ka jingpom pathar ïa ki khlaw ki btap ka la sdang khamtam eh haba ka jingdon kam rnga jong ki karkhana kum ha Byrnihat bad Rwiang ka la sdang. Ha kine ki sngi lei lei wat ki sim ki doh ki mrad ki mreng naduh kiba heh haduh kiba rit imat ki la duh jait syndon, namar ki khlaw ki la synlen lut ki rud wah ki la khuid kdar bad ka la ktah haduh katta katta ïa baroh ki jingthaw ba im.
