Shillong, Nailur 25 : U Myntri Rangbah ka jylla u Conrad K Sangma mynta ka Sngi Balang u la ong ba ka sorkar ka trei borbah ban rat dyngkong ïa u drok hapoh ka jylla.
“ Ka sorkar khlem jingartatien ka trei borbah ban pynthikna ban ïakhun ïa kane ka thma pyrshah ïa u drok hapoh ka jylla” ong u Myntri Rangbah haba ïakren bad ki nongthoh khubor.
U la ong ka sorkar ka shim khia bha ïa kane ka kam bad ka trei tyngeh khlem shongthait ban weng ïa kane ka jingeh kaba la ktah ïa ka imlang ka sahlang lyngba une u drok.
U la ïathuh ba la pyntreikam ruh ïa ka aiñ Prevention of Illicit Traffic in Narcotic Drugs and Psychotropic Substances Act (PITNDPSA) ban ïakhun pyrshah ïa u drok.
“ Ka jingshisha ba 450 ngut la ïoh kem bad ki dang don 250 tyli ki case ki dang ïaid shakhmat bad da ki spah klur tyngka u drok la ïoh kurup ka pynpaw shai kdar ba ka sorkar ka khlem shong kli kti hynrei ka trei borbah ban rat dyngkong ïa u drok” ong u Myntri Rangbah.
U Myntri Rangbah u khot bad ïawer lang ïa baroh ban ïatrei lang ban ïakhun ïa kane ka thma pyrshah ïa u drok.” Dang shen nga la pynmih kawei ka hukum ban thaw kawei ka Committee ka ban khlieh da u ne ka Addiditonal Deputy Commissioner ha man la ki nongbah jong ki district hapoh ka jylla bad u ne ka ADC jong kata ka District kin khlieh ia kata ka Committee bad ki Rangbah Shnong bad ki committee bapher bapher, ki seng samla, seng longkmie, seng bhalang kin long ki dkhot. Ka daw ka long ba ngi donkam ban ïatrei lang ryngkat ryngkat ban ïakhun ïa kane ka thma pyrshah ïa u drok” ong u Conrad.
U la ong ka sorkar ka la shim bun ki lad ki lynti ban ïakhun ïa u drok. Na kata ka daw ïa ka DREAM Project ba la sdang ban pyntreikam ka la rung shaduh ki tynrai duh . Kane ka bynta kaba ngi la shim dang shen ka pynpaw shai kdar ba ka sorkar ka shim khia ïa ka jingïakhun pyrshah ïa u drok.
U la ong pat ha kajuh ka por ba kane ka thma pyrshah ïa u drok kam long kaba suk namar ka kam khaïi drok ka dei shaduh shabar u pud ka jylla bad jongka ri hi ruh baroh kawei.
“ Kumta kam long kaba suk ka long ka kam kaba hap ban ïakhun tyngeh bad na kata ka daw baroh ki nongtrei sorkar naduh ka sorkar pdeng, sorkar jylla ki bor synshar district ngi pynthikna ba baroh dei ban ïadon bynta lang ban ïakhun ïa kane ka thma khnang ba ngin lah ban khanglad bad rat dyngkong ïa u drok” ong u Myntri Rangbah.
