Shillong, Nailar 21 : U Nongïalam ka Liang Pyrshah u Dr Mukul Sangma ha ka Sngi Saitjaiñ u la khot bad ïawer ïa ki paidbah ban wanrah ka jingkylla ha u 2023 da ka ban ym ailad shuh ïa ka sorkar MDA ba kan dang wan phai biang ha ka bor.
“ 2023 un long u snem uba jwat bha, namar kata to ngin ïadon bynta ban pynsah nam da kaba ïatrei lang bad wanrah ïa ka sorkar ba thymmai. Ngin ïatrei lang ban thaw thymmai pat ïa ka jylla bad ban plie lad plie lynti ïa ki khun samla. Ngin thaw thymmai ïa ka jylla kum ka jaka pdeng jongka pule puthi bad jaka sah pyngngad namar kine ki dei kiba ka jylla ka la don lypa bad donkam sa tang ban pynkhlaiñ ïa ka rukom pyntreikam ïa ki” ong u Dr Mukul haba kren ha ka jingïalang seng Unit ïa ka TMC ha Pynthorumkhrah.
U la ong ba kane ka sorkar MDA ka dei kaba kwah ban pynjah burom ïa ka jylla namar kim sheptieng ïa U Blei da kaba thmu ban pynlong ïa kane ka jylla ka ktem ïa khalai. “ Hato phi kwah ba kiwei kin tip ïa phi kum kata ka jylla kaba ki briew ki ïabeh ban wan ïa khalai bad leh ïa ki kam awria? Ngim kwah ïa ka jylla ba kan kylla kumta hynrei ngi kwah ba kan long ka jylla kaba don burom bad kaba bnah nam da ki kam ba bha kum ka jaka pdeng ka pule puthi, ka jaka pdeng ban wan kai bad sah pyngngad bad ter ter” ong u Dr Mukul.
“ U Blei u la kyrkhu ïa ka jylla da ki spah mariang bad kiei kiei ki jingmih na ka mariang. Mano ba ym pat bna ne tip ïa ka Cherrapunjee ne Sohra, kumta kan long ka jylla kaba riewspah na kine ki jingkyrkhu jong U Blei ïa ka mariang ba la ai ha ngi” ong biang u Dr Mukul.
U la ther ruh ïa ka sorkar MDA kaba la pynsuki ïa ki projek bapher bapher ha ka jylla kum ka Medical College bad kiwei kiwei ki College.
Balei ba ka Engineer College ha Mawlai kam pat plie haduh mynta, kine baroh ki dei ki jingmyntoi ba ki paidbah ki la shah pynduh. Kumta wat long shuh tang ki nognpeit kai bad sangp jar, namar ka por ka la dei ban mih shakhmat ban wanrah ka jingpynthymmai da kaba ïatrei lang kum ka imlang ka sahlang.U la kylli shano jah rngai ka pisa kaba dei ka baibam ki nongtymmen, ka pisa ba dei ban ai sha ki kmie ba shah ieh khun rei, ka jingïarap ïaki khun swet kiba shong kurim bad ter ter.
Shaei jah ka skhim na ka Asian Development Bank ha ka kyrteng Human Capital Development kaba la mang nalor ban pynbha ïa ki kamra klass, la mang ruh ïa ka pisa ban ai jingpyntbit ïa ki nonghikai. Hynrei mynta ki nonghikai haba ki kwah ban pyntbit ki hap ban pynlut da ki lak , hajar bad spah tyngka ba kin leit pyntbit ha ki jingpule jongki. Kylli ïa kiba leit pule B.Ed katno ki hap ban siew. Kaei kaba la jia ïa ka pisa kaba la mang na ka ADC na ka bynta kine ki prokram? kylli u Dr Mukul.
