H a shwa ba ka jylla kan pdiang ïa u Snem Thymmai, to ngin ïa phai dien shwa khyndiat ïa ka jingïaid lynti jongngi ha kine baroh shisnem, kaei kaba ngi la noh synniang, kaei kaba ngi la leh ïa ka imlang sahlang bad kaei pat kaba ngi la leh na ka bynta ban pynim biang ïa ka burom ka akor bad khamtam eh ha kane ka juk kaba baroh ki la klet lut bad kheiñ dewthala lut ïa ka jingïaburom parabriew, la jyllei sa tang ka ïabeiñ ïa khoh wat hapdeng ki nongïalam jong ki seng saiñpyrthei, hapdeng ki nongïalam jong ki kynhun haduh ba kane ka la ktah jur ïa ka burom jong ka jylla bad jong ka Jaidbynriew hi baroh kawei. Kumta, ha kane ka por ba ngi pynkhreh ïa u Snem Thymmai, ngin pynkohnguh ïalade ban pynthymmai shwa ïa ka burom ka akor briew ha shwa ba ngin pynthymmai ïa ka rukom im bad ka jinglongshimet shimet jongngi ha ki iing ki sem kaba man la ka sngi.
Sngew dei ruh ban ong ba ka la dei ïa baroh khamtam ïa ki khun samla ba kin buh thong ba kawei na ki thma ba jar jar jong ka Jaidbynriew bad jong ka Jylla kaba la bam kruin mynta kadei ka burom ka akor ha kaba ki khun samla ba dang khie kim don shuh ka jingburom ïa kiba la san. Lada shu peit lei lei ha ki rynsan social media la ïohi kumba ki khun samla kim don shuh ka jingburom wat ïa ka burom lajong khamtam ïa ka rympei iing ba ki wan. Ki don ki jingjia kaba la ïohi ba kim don shuh ka jingburom ïa kiba la san hynrei ki la kren da ki kyntien jem daw. Kim don shuh ka raiñ ka rem lane pyrkhat ba kaei kaban jia lada don pat kiba kren ïa ki bahaiing hasem jong ki hi lada ki ngat ha kum katei kajuh ka apot. Kane kadei ka por ba hap ban phai dien ha shwa ba kin jam pat sha u snem thymmai.
La ïohi ruh ba katba nangïaid ki por ki sngi bad ki snem ka jinglong jingman jong ki briew ruh ka la nang kylla. Watla kane ka jingkylla ka la wanrah shibun ki jingroi jingpar bad jingbha ha ka liang ka imlang sahlang, hynrei ngi ïohi pat sharum shaneng ba ka jingïaburom briew ka la jan duh noh bad wat ka mynsiem jingïatip lem para briew ruh i kumba ka la ïap.
Ki ‘tien sneng bad jingkren khlem akor ha ki lynti syngkien ki la jyllei haduh katta katta, la ha kiba la san la rangbah, ki samla wat haduh ki khynnah rit ruh. Teng teng i kumba baroh baroh ngi la ïa mlien bad sngewtynnad ban sngap ne ngi la set kyllut noh ïa la ki jong ki shkor. Kaba kham i saitmet ka long ba ynda la dei lei lei sa u khawyiang i kumba thik ki la dei ki syiem jong kato ka jaka, khlem raiñ khlem rem shuh ïa ki tymmen ki san lane ïa ki rangbah kiba ïaid ba ieng na kato ka jaka.
Ym lah shuh ban mutdur ba kito kiba mlien ban leh ïa kitei ki jait kam ki don ne em ka jingïatip lem ne kata ka bor sngewthuh briew ka ban pynpyrkhat ïa la ka jingleh ka pynsngewtynnad mo ïa kiwei pat kiba ïohi ïa ka jingleh jong ki ne ki sngewsarong pynban. Lada ka jingïatip lem bad jingsngewthuh briew ka dang don hapdeng jong ki briew khlem pep kum kitei ki kam jaboh kin nym ïoh jaka hangno hangno ruh. Kumba ong ka kyntien, ka daw baroh kadei ba tlot na la rympei, lehse kane ruh ka kdew sha kata hi ka phang. Lehse lah ruh ban ong ba imat ym don shuh ka sneng ka kraw na ki ïing ki sem ne dei ba ki kmie ki kpa kim ïa don por shuh ban ïa phylliew jingmut ha ïing ha sem, halor kaba sniew bad kaba bha khnang ba kiba dang khie dang san kin sngewthuh bad bud ïa kaba bha.
Ka dei ka kamram ba tynrai jong ki kmie ki kpa ki kñi kiba la san la rangbah ban hikai ïa ki khun ki kti ki pyrsa ki para kumno ban ri ïa ka akor bad burom la ha ïing ha sem ne shabar naduh ba ki dang rit.
Ha kawei pat ka phang ym lah ruh ban khlem da kynthup lang ïa ki nonghikai skul naba bun na ka por jong ka jingim ki khynnah kadei beit ha ki skul. Ki ruh ki don ka bynta kaba kyrpang ban ai ha ki khynnah ïa ki jinghikai shaphang ka akor nalor ka pule ka puthi bad ka jingnang jingstad. Ha ki por barim, mynba dang ïeng rasong ka akor tipbriew tipblei bad ruh ka jingïatiplem jong ki briew ka dang im, ka jingïaburom para briew ruh ka dang don jaka. Phin shem ruh ba ym ju kham lap ne shem ba u khynnah un shlan ban kren ki ktien khlem akor hajan jong ki rangbah briew bad ki riewtymmen. Ynnai ïakren shaphang u duma ne sikret ha kito ki por ki khynnah rit kim ju nud ban dih duma ne sikret ha khmat kiba san la rangbah la ki long kiba ithuh ithaw ne ki bym ithuh ruh.
Hynrei ha kine ki por ba mynta ym don shuh uba salia ban leh ïa kitei ki kam wat hakhmat kiba ha ïing ha sem ne wat ha khmat ki kmie ki kpa la jong hi ruh.
Haba ïakren ïa kaba shabar ne la ka ïing ka sem lei lei te ki khynnah ki nud wat ban shong dih kyiad, kynja bad ruh kiwei kiwei pat ki jingdih buaid ha ki surok ki lynti syngkien khlem da salia ïa ki nongïaid nongïeng kiba la san la rangbah ruh. Kumba la kdew haneng ki jinghiar dor ka akor briew khamtam ha ka ktien ka thylliej khamtam eh hapdeng ka jaidbynriew jong ngi, ym tang ba ka pynsarong ne pynsngewsih ïa uba bun balang hynrei ka long pynban ka kabu ïa kiwei pat ki jaidbynriew ban pyrthuh lang ïa kitei ki kyntien jaboh haba ïaid ki kynthei, ki longkmie ki jongngi hi.
Watla ka akor briew ka la hiar dor ha bun ki liang ha ka imlang sahlang kam dei ban wanrah ïa ka jingsngewdiaw ban duh jingkyrmen, hynrei dei ban wad ïa ki lad ki lynti kumno ban pynbha bad pynrung biang ha ki briew ïa ka mynsiem ïatiplem khnang ba kin phai biang sha ki sngi mynba ka akor ba bha hapdeng ka jaidbynriew ba dang ïeng rasong. Ka la dei ruh ka por ba ki kmie ki kpa kiba la heh la san kin kyndit bynriew kumno ban hikai ïa la ki khun ba kin nym pyndonkam ïa ki ktien jaboh ha ïing hasem, ha lynti syngkien bad shabar.
