Tip kumno ban sumar ïa u klongsnam, kyntu ki doktor
![](https://mawphor.com/wp-content/uploads/2022/03/mawphor.jpg)
Shillong, Risaw 02 : Ïa ka World Heart Day la ju rakhe ha ka pyrthei shi tyllup man la ka 29 tarik Nailur ban pynsngewthuh ïa ki paidbah shaphang ka jingpang klongsnam, kaba dei ka jingpang kaba shim bun tam ki mynsiem briew ha ka pyrthei.
Ha ka jingrakhe ïa katei ka sngi, na ka liang ka District NCD Cell hapoh ka National Programme for Prevention and Control of Non-communicable Diseases (NP-NCD), East Khasi Hills ka la pynlong ruh da ka jingïakob ïa tyrko ha KJP Synod Conference Hall, Lachumere kaba ïadei bad katei ka jingpang.
Ka jingthmu jong kane ka long ban pynrung ïa ka jingsngewthuh ha ki nongshim bynta bad ruh ki nongsngap na kylleng ki skul shaphang kumno ban sumar ïa u klongsnam. Ïa ka khusnam lahduh la ïoh ban khur da ka St. Edmund’s Hr. Sec, School, ïa ka kyrdan ba ar da ka Pine Mount School bad ïa ka kyrdan kaba lai da ka Laban Bengalee Boys’ Higher Secondary School.
La donlang ruh ha kane ka sngi ka DC jong ka East Khasi Hills, Kong RM Kurbah kum ka Kongsan kaba la kdew ba ka rukom im kadei kawei ka bynta ba kongsan. Kumta ka kyntu ban kham pynbun ka por ha kaba khih ba ksar ha ka leit ka wan ban ïoh ïa u klongsnam uba shait ba khlain ha kane ka juk jong ki kor ki bor thymmai.
Na ka liang i Dr R. Allya DHS MCH& FW haba kren kum i Symbud Kongsan i la ong ban sumar ïa u klongsnam dei ban tip kumno ban kiar ïa ki jingmlien ba sniew kiba ktah ïa ka bor jong u.
La ïoh ruh ïa ka jingpynshai na u Dr. Synrang Warjri, u Cardiologist ba pawnam uba la batai bniah bha haba ïadei bad u klongsnam bad kumno ban kiar na ki jingbam jingdih kiba long ki nongshun jong u.