Thwet jur ki pulit ban lap dien ïa ki shikurim ba na Indore kiba jah rngai na Sohra naduh Sngi Palei
Shillong, Jymmang 26 : U Superintendent of Police ka East Khasi Hills Bah Vivek Syiem, ha ka Lah Sngi U Blei ula pyntip ba ka jingthwet bad jingbud dien ka la ïaid shaid shaid ban lapdien ïa ki shikurim ba na Indore-kiba jah rngai ha Sohra naduh ka Sngi Palei.
Kine ki shi kurim ki dei u Raja Raghuvanshi bad ka Sonam Raghuvanshi.
Kat kum ka jingïathuh u Bah Vivek, ïa kine ki shikurim la ïohi khatduh ha ka sngi Palei ka 22 tarik Jymmang. Kila wai ïa ka scooty Yamaha na Keating Road, Shillong bad leitkai sha Mawlakhiat. Nangne, kila hiar sha Nongriat bad sahmiet ha ka Shipara Homestay.
“Kine ki shikurim kila mih na Nongriat ha ka por mynstep kumba 5:30 baje eiei bad kila wanphai la Mawlakhiat” ong u bah Vivek haba bynrap “Hynrei, ïa ka scooty la pyntip hadien ba la shu ieh ha Golden Pines Dhaba, Sohra Rim da ki nongshong shnong, ha ka 23 tarik Jymmang”.
ïa kane ka scooty kaba dang don lang bad u shabi, la aiti noh sha ki Pulit ka Sohra. Hadien kane, la pyntip sha ka Police Control Room bad hadien ki bahaïing hasem kila pyntip ïa ka jingjah rngai jong kine ki arngut ki shikurim.
U Bah Vivek u pyntip ba ka jingwad ïa kine ki shikurim kala ïaid shakhmat. “Ngi la pyntip ïa baroh ki kynhun kynthup ki shnong ba marjan bad ki Pulit lem bad ki Home Guard kila don sha ki jaka ba marjan ka Sohra Rim ban wad ïa kine ki briew”.
Haba kylli la ka don ka jingsuba shah leh sniew, u Bah Vivek ula ong “ïa mynta hi, ka dang kloi palat ban ong eiei. Ka kam ba hakhmat eh ha ngi ka long ban lap shuwa ïa ki. La ïohi khatduh ïa ki ha Nongriat bad kila mih noh ha ka step kaba bud. Ngi dang pyrshang ban buddien ïa ka leit ka wan jong ki”.
U Bah Vivek u pyntip ba ki bor Sorkar kila dep pynmih ïa ka jingbthah ïa ki nongwan shangkai sha Sohra ba kin long kiba phikir bha ïalade. “Ha ka jingshisha, kila shim ïa u nongïalam lynti (guide) na Mawlakhiat sha Nongriat. Hynrei, ha ka por ba ki wanphai, ym shym la don shuh ba ïalam lynti ïa ki. Ka jingshem ïa ka scooty ba shu ieh ha ryngkat u shabi ka long kaba eh ban batai bad ka jingwad ïa ki kala ïaid shakhmat”.
Ki bor khmih kila kyntu ïa ki trai shnong bad ki nongleit shangkai sha ka thaiñ ba kin pyntip lada don kino kino ki jingtip kiba lah ban ïarap ha ka jingwad ïa kine ki shikurim.