Sei madan u nongshah dawa pisa ïa ka kyrteng uba leit lum pisa ïa ki jingdawa ka HNLC

Shillong, Jymmang 26 : Uwei u nongshah dawa pisa ha ka seng Hynniewtrep National Liberation Council (HNLC) u la sei madan ïa ka kyrteng jong uwei u nongwan lum pisa ïa katei ka seng uba kyrteng u Synshar Khymdeit bad u dei uwei ruh na kiba ïasoi lang ïa ka shithi kum ki Area Collector.
Ha ka shithi ba la phah da ka Post sha u President ka Shillong Press Club u bah D.L Siangshai la kynnoh ba une u Synshar Khymdeit u dei u juh u briew uba la wan ban pynshai ha Shillong Press Club ba um don jingïadei ei ei ruh em bad ka seng HNLC. ïa kane ka shithi ba la phah naduh ka 17 tarik Iaiong 2025 la ïoh pdiang dang ha kine ki sngi ha Shillong Press Club.
Ha ka 1 tarik Nailar 2023 u Synshar Khymdeit u la wan sha SPC ban pynshai bad kyntait ba u donkti ha kaba leit sam ïa ki shithi dawa pisa ka HNLC sha ki nongkhaïi. Kane ka long hadien ba ka kyrteng jongu ka la paw ha kawei na ki kot khubor khasi ba la phla da kawei ka longkmie na Mawlai ba u wan ai ïa ka shithi dawa pisa sha ka ha kaba la dawa ba ka dei ban siew 20 lak tyngka.
Shwa ïa kane ka kyrteng u Synshar ka la paw ha ka shithi dawa pisa jongka HNLC ba u dei kum u Area Collector jongka ha East bad Ri Bhoi District.
Une u nongkhaïi u la ïathuh bab u la ïoh pdiang ïa ka shithi dawa pisa na ka seng HNLC ha kaba nyngkong eh ha ka 28 tarik Kyllalyngkot 2022 ha kaba la dawa ban siew haduh 4.4 lak tyngka.
Ha katei ka shithi dawa pisa la thoh “ Ha ki nongsiew khajna, Da kane la pyntip sha phi ba ka tarik ba khatduh ba phin siew ïa ka khajna ( income tax) kan long ha ka 3.3.2022. Namar ba phi dang dei ka dukan ba thymmai phi hap ban siew 4.4 lak tyngka. La bthah ba phin buh lypa ïa ka pisa ha katei ka sngi ban lait na kino kino ki jingjia ba sngewsih. La pynkynmaw ruh ïa phi ba lada phim ïatrei lang, ngin ym don lad shuh da kumwei hynrei ngin leh da kiwei ki lad ki lynti ba phin siew ïa katei ïa ka pisa. Lada phi pyntip sha ki pulit ngin sa wan buh da u bom hakhmat ïing jongphi bad phin duh lut ïa kiba ieit ba thoiñ jongphi, kynmaw bha ïa kane, ngim ju kren kai, ha shwa ban kut une u bnai ngin pynbthei bom ha Police Bazar ban pynkynmaw ïa ki briew kum ma phi ba phim dei trai nangne kumta siew lane iap”.
Une u briew u la phla ruh ba u la siew ïa katei ka pisa namar u la sheptieng eh ïa katei ka jingbyrngem.
“ Ha kaba sdang nga dang pyrkhat ba ka dei ka kam kai suda, hynrei haba la jia ka jingbthei bom ha Police Bazar ha ka 30 tarik Kyllalyngkot jong utei u snem, ngam don lad shuh da kumwei hynrei ban siew beit ïa kaei kaba ki dawa namar nga sheptieng ïoh ki wan leh kumjuh ha ka dukan jong nga. Nga la pynbiang ïa ka pisa bad ha ka 3 tarik Lber utei u Synshar Khymdeit u la wan ban shim ïa katei ka pisa na ka bynta ka HNLC”.
“ Kumjuh ruh shisnem hadien kata ha ka 3 tarik Lber 2023, une u juh u briew u la wan biang sha ka dukan jong nga bad pan ïa ka pisa da kaba byrngem ba lada ngam siew, ka HNLC kan sa pynleit lut ïa baroh kiba haïing hasem jong nga”. U la ïathuh ruh ba u Synshar u la phla ba kin dang ïai pynbthei bom ha kylleng ki jaka jongka nongbah Shillong, kum ha Tem Metor, Iewduh, Mawbah ha u snem 2024, 2026 bad 2028. “ Namar nga sheptieng palat ïa kane ka jingbyrngem kine ki briew kumta ngam banse ban phah ïa kane ka shithi shaphi.
Ula ïathuh hadien ba la ïoh pdiang biang ïa ka shithi dawa pisa kaba ar ki la rai ban pynkynriah noh ïa ka dukan jongki na kaba don mynta sha kawei pat ka jaka ha kawei pat ka kyrteng ruh.
“ Ngi la leit sah lang ruh bad kiba haïing i lok jong nga.Nga pat nga sah sha kawei ka jaka na ka bynta katto katne por tad haduh ba ngin da ïoh jaka sah da kaba shngaiñ na ka bynta baroh ka ïing ka sem jong nga” pynkut utei u nongshah dawa pisa.