Khliehriat, Nailur, 07: Kum shi bynta ban rakhe lang bad ka pyrthei hi baroh kawei, ïa ka sngi kyrpang ban pynkhuid ïa ka lyer ha ka mariang bad ju tip kum ka world clean air day, ka Jaiñtia National Council, hapoh ka jingïalam u Chairman ka Environment committee, u bah Nini W Sungoh ryngkat bad ka JNC San shnong Circle, mynta ka sngi ka 7 tarik u nailur ki la pynlong ïa ka jingthung dieng ha shnong Mutong hajan ki jaka ba don ka kshaid Moopun.
Ha ka jingïalang ba la pynlong ha shnong Mutong, u bah Synjoy Bareh, uba dei u Secretary jong ka committee, u la ai ïa ka jingkren maitphang halor ka mat ban pynkhuid ïa ka lyer lane ka world clean air day,
U Chairman jong ka Environment committee, u la ong ba ka jingthung ïa ki dieng ha kine ki sngi ka long kaba donkam bha khamtam ban iada bad ban pynneh pynsah ïa ka mei mariang, kumjuh ruh na ka bynta ka bha ka miat ka shnong, u la kyntu ruh ïa kiwei kiwei ban kin sngewbha ban iasnoh kti lang namar shibun ki dieng ki siej kila jan jah na kane ka thaiñ.
Naka liang u President JNC Sanshnong Circle, u bah Keling Phawa, u la ong ba ka jingbun ki karkhana coke bad ki karkhana shna dewbilat ki wanrah jingeh bha khamtam ki pynmih ïa ka lyer ba sniew kumta u la kyntu ïa baroh ba ka long kaba donkam ban shimkhia bad ban thung da ki dieng khnang ban lah ban wanrah biang ïa ka lyer kaba khuid.
Ha kane ka sngi, la ïa don ryngkat lang ruh u Waheh shnong jong ka shnong Mutong, u bah Marshi Dkhar lem bad ki nongialam bad ki dkhot jong ka JNC.
