Thung ka Sorkar ïa ka Prof. SM Sungoh kum ka Chairperson jong ka State Education Commission

Shillong, Naitung, 25: Ka Sorkar Jylla ha ka sngi Ba-ar ka la pyntip paidbah ba la thaw ïa ka State Education Commission ha kaba ka Prof SM Sungoh na Department of Education jong ka North Eastern Hill University (NEHU) ba kan shimti kum ka Chairperson.
U Prof David Reid Syiemlieh uba long u Chairman barim jong ka UPSC un long kum u Adviser Academic, u Executive Chairman barim jong ka MBoSE u Tony TC Marak un long kum u Adviser School Sector Reforms, katba u Secretary jong ka tnat Pule Puthi ka Sorkar Jylla u Ambrose Ch Marak un long kum u Member Secretary.
Ki Co-opted Member jong ka Commission ki kynthup ïa ka Dr. (Mrs) C A R Diengdoh, Retd CDC NEHU, Shillong, ka Dr. (Mrs) Vanessa Kharmawphlang, Retd Principal, CTE (PGT) Shillong, ka Dr. (Mrs) Nikme Salse Ch. Momin, Professor NEHU, Tura Campus, u Bah P Ryngksai, Retd. Addl. Director of School Education & Literacy, Shillong, u Dr. Charles Reuben Lyngdoh, Associate Professor, Synod College, Shillong, u Dr. Sanggra A Sangma, Associate Professor, Department of History, Don Bosco College, Tura, u Rahul Chatterjee, Assistant Lecturer (Physics), Jail Road Boys’ Higher Secondary School, Shillong, u Brother Solomon T. Morris, Principal, St. Edmunds School, Catholic Christian Brother Institution, Shillong, u Richard Uriah, Principal North Liberty Hr. Sec. School, Jowai, u Bah F. C Shullai u nonghikai Primary School ba la shongthait, Polo Hills, Shillong, u Bah Aaron Warjri, Principal Shillong Public School, Shillong bad u Dr. (Fr) Philip Abraham S.J., Principal Loyola College & Loyola HSS, East Garo Hills, Williamnagar.
Ka jingpynbna ka ong ba ka State Education Commission kan sdang ban treikam noh mardor bad ka samoi treikam kan long arsnem.
Ki kyndon treikam jong ka Commission ki long ban ai jingmut ïa ka Sorkar Jylla halor ki kam kiba ïadei bad ki rukom pynïaid ïa ki skul bad Kolej, ka jingshna tulop ïa ki skul/kolej, ka jingtreikam jong ki School Management, ban ai jingmut ha kaba ïadei bad ka jingpynkhreh ïa ki polisi treikam ban pynjanai ïa ki skul, ki jingpule kiba shalor katkum ka NEP-2020 bad ban pynurlong ïa kane ka thong khnang ban kyntiew ïa ka pule ka puthi ha ki skul, kolej bad Higher and Technical Education.
Ki kamram ba la bynshet ha ka Commission ki long ruh ban khmih ïa ki kam kiba ktah ha ka pule puthi ha ka jylla Meghalaya, halor ki kam ba ïadei bad ka jingpynïaid ïa ki Aided School bad College, ka jingtreikam jong ki School Managing Committee, ban pynwan lang kawei ïa ki skul bad kolej kiba ïoh jingkyrshan jingïarap pisa na ka Sorkar bad ban ai jingmut ha kaba ïadei bad ka jingkyntiew kyrdan (Aided) ïa ki skul, ban peit ba ka jingsiew tulop sha ki nonghikai jong ki skul ba ïoh jingkyrshan na ka Sorkar
ka dei ban long markatjuh khamtam ïa ki skul ba la pynïaid da ka Sorkar, ban peit ïa ki jingeh jong ki nonghikai ha ki skul Samagra Shiksha Abhiyan (SSA) bad ban pynshongnia khamtam ïa ki skul ki bym lah ban kiew, ka jingbun jong ki skul, ka jingduna ki khynnah ha ki skul, ka jingdon tang iwei i nonghikai ha ki skul, ka jingeh kaba ïadei bad ki nonghikai skul ha ka ktien ka thylliej khamtam ha ki shnong khappud, ban bishar ïa ka jinglong jingman, ka jingeh jong ka tnat Pule Puthi, ban ai jingmut ha kaba ïadei bad ka jingpynbha bad ban weng ïa ki jingeh, ban wanrah ïa ki kyndon kiba pynjanai kiba ïadei bad ka tnat Pule Puthi, ban ai jngmut halor ki polisi ba la aiti da ka sorkar bad ki kynhun batbit jong ki Agency, ban pynwan dur thymmai ïa ka Meghalaya State Education Policy bad ka NEP 2020 bad ban thaw ïa ki kyndon/jingai jingmut halor ki Syllabus bad ki Curricullum Framework na ka bynta ki skul.