Shillong, Ïaïong 06: Ka sorkar jylla ka la thung ïa ka Committee kaba don 28 ngut ki dkhot ban khmih halor ki kam ban pynneh pynsah ïa ki riti dustur, ki kolshor bad ka jinghiar pateng jong ki paid Garo.Ïa kane ka committee yn khlieh da u Myntri ka tnat housing u Marcuise N Marak, ïathuh ka jingpynbna ba la pynmih da u chief secretary u Bah DP Wahlang ha ka 3 tarik mynta u bnai. Ki dkhot kane ka committee ki kynthup ïa u deputy speaker Timothy D Shira, u secretary in-charge arts and culture RP Marak, u CEM ka GHADC Albinius R Marak. Katkum ka jingong, la bthah ïa kane ka committee ba kan khmih lut ïa baroh ki jingdonkam kiba ïadei bad ka khana pateng jong ki Garo, ka kolshor jong ki bad ka jingdonkam ban pynneh pynsah ïa ki. Kane ka committee kan ai jingmut ruh kumno ban wad ki lad ki lynti ban pynneh pynsah ïa ka kolshor ki Garo, ka jinghiar pateng jong ki bad kiwei kiwei pat ki mat kiba donkam. La bthah ruh ïa ka committee ba kan aiti ïa ka kaiphod sha ka sorkar jylla kham kloi katba lah.
