Nongpoh, K’lyngkot, 24: U Senior Scientist ka Meghalaya State Pollution Control Board, u Bah S. Swer mynta ka sngi u la pynpaw ba ka Meghalaya State Pollution Control Board kam shym la shong kli kti, hynrei ka la trei shitom ban ïa khun pyrshah na ka bynta ban pynduna ïa ka lyer jaboh ha Byrnihat, kaba dei hadien ba ka Byrnihat ka ka la ioh nam kum kawei na ka jaka ba pynmih bha ïa ka lyer jaboh hapoh ka ri India.
U Bah Swer kum u Scientist ka MSPCB, u la pynpaw ruh ïa kane hadien ka jingïakynduh ïa u MLA ka Jirang, u Bah Sosthenes Sohtun, uba la lum la lang ïa ki ophisar na ka bynta ban thaw ïa ki lad ki lynti ha kaba ïa khun pyrshah ban pynduna ïa ka lyer jaboh ha Byrnihat.
U la ong ruh ba ïa ka daw ka jingioh nam ka Byrnihat kum ka jaka ba jaboh ha ka ri, kim pat lah ban tip ïa ka daw tynrai, namar kane ka lyer jaboh ka wan na kaei ka jaka, la ka dei na u pud u sam ka Meghalaya ne na Assam, namar ha katei ka jaka ki don bun ki Karkhana la ka long ha na Meghalaya bad na Assam bad kumjuh ruh ki nongshong shnong kiba bun bad ki kali paidbah ruh ki ïaid lyngba ka surokbah NH-6 ha Ri Bhoi District.
Ban lap ïa ka daw jong ka jingmih ka lyer jaboh ba la ioh nam ha ka ri, u Bah Swer u la ïathuh ba ka Meghalaya State Pollution Control Board ka la pynkhamti da ki riew shemphang ban wad bniah ïa ka daw jong ka jingmih ka lyer jaboh, kata la pynkhamti ïa kane ka kam sha ka Center for Science & Industrial Research-National Environmental Engineering Research Institute (CSIR-NEERI), Kolkata bad lyngba jong kane ka Center ki don ki riew shemphang kiba wad bniah lyngba ki kor ki bor khnang ban tip nangno ka lyer jaboh ka wan khnang ban lah ban tehlakam ïa kane ka jingmih jong ka lyer jaboh.
Shuh shuh, u la ong ruh na ka liang ka Meghalaya State Pollution Control Board kam shym la shong kli kti bad ka dang ïaid shaphang ban ïakhun na ka bynta ban pynduna ïa ka lyer jaboh da kaba pyntreikam ruh ïa ka thong jog ka National Clean Air Programme (NCAP) ha kaba yn shim bynta na baroh ki liang ban ïa trei ryngkat kum ka thong ban pynduna ïa ka jingmih ka lyer jaboh kaba ktah ïa ka koit ka khiah ki paidbah bad wat ïa ka mei mariang, u la bynrap.
