Shillong, Nailar 06: Ka Rotary Club jong ka Orchid City Shillong ha ka 3 tarik Nailar ka la pynlong ïa ka jingthung ïa ki 200 tynrai ki diengsoh ha St Joseph’ Higher Secondary School, Umden Ribhoi District lyngba ka projek Hariyali-Tree for Future kaba la bei tyngka da ka Mahindra Finance.
U DC jong ka Ribhoi u Arpit Upadhayaya, IAS u la ai jingïaroh ïa ka sienjam kaba ka ka Mahindra Finance ka la shim bad u la kyntu kynpham ba ka skul kan sumar bha ïa kine ki deingsoh ba ka mariang bad ki sawdong sawkun kin long kiba tap da ka jingjyrngam. U DC u la ban ruh ïa ka jingdonkam ban ïada bad pynneh pynsah ïa ki jingdon jingem ka mariang.
U Rtn Vivek kumar, vice President& Chair-Project Hariyali ha ka jingkren jong u u la ong ba ka jingïada ïa ka mariang ka dei ka deiti kynlum lang jong baroh ki khun bynriew bad u la ong ba ka jingthung dieng ka dei ka lynti ba bha tam na bynta ka jingïada mariang.
Shuh shuh u la ïathuh ruh ba ïa kum kane ka projek la sdang ha Khliehtyrshi Village, Jaintia Hills ha ryngkat ka jingïatreilang bad ka Rotary Club Jowai bad ha Nongkhlaw jong ka Eastern West Khasi kum ka sienjam ban kynjoh sha ka thong ka mei mariang ba jyrngam.
