Jowai, Jylliew 06: Ka seng Khynroo Khyllood Committee (KKC) jong ka Seiñraij Jowai hynnin ka sngi kala pynlong ïa ka prokram ai jingpynshai ïa ki khynnah skul halor ka phang “Beat Plastic Pollution with Special reference the Impact of Jowai Town” bad kala pynlong ruh ka jingthung dieng hapoh ka khlaw kyntang kaba la tip ka Khloo Langdoh ba don ha nongbah Jowai.
Ha kane ka sngi kila don ki riew shemphang kiba la wan ban ai ka jingpynsngewthuh sha ki khynnah skul kiba kynthup ïa ka Kong Nilamroi Passah, Senior Secretary Martin Luther Christian University Shillong.
Ïa kane ka prokram la ïatreilang hapdeng ka Khynroo Khyllood Committee, Seiñraij Jowai bad ka Yess Meghalaya hapoh ka jingpynïaid jong u Rangbahmi Kynjin, Chairman ka KKC Seiñraij. Kiwei de kiba ai jingkren ha kane ka sngi ki kynthup ïa u ma O.R. Challam, President Seiñraij Jowai, u ma Arwotki Sumer, General Secretary Seiñraij Jowai, bad la ïoh ïa ki kyntien sngewnguh na u ma Sienmi Lato, Secretary KKC Seiñraij.
Ki khynnah skul kiba la wan ban ïashim bynta ki kynthup ïa ka Chilliangraij SSA UPS, Chilliangraij Govt. LPS, Loompyrdi Iongpiah UPS SSA, Dulong Govt. LPS, Pohmusiang UPS SSA, Government Girls Hr. Secondary School, Jowai wa ka Panaliar UPS SSA, ha ryngkat ki rangbah jong ka Seiñraij Jowai.
