Nongstoiñ, Jylliew 6: Ka shnong Tiniang ryngkat ka jingïatreilang bad ka seng KSU Tiniang Unit kumjuh bad ka Seng Samla Shnong Tiniang, ha ka sngi hat majai ki la hiar sha ki bynta jong ka Wah Rwiang ban jurip ïa katei ka Wah, kata hadien ba ki la ïoh ïa ka jingujor bad ka jingshah kren pynjah burom ïa katei ka shnong, namar ka jingbret pathar jong ki briew ïa ki bilor kyiad bad kiwei kiwei ki jaboh ha shilynter jong katei ka Wah kaba itynnad.
Hadien katei ka jingjurip, katei ka kynhun ka la lap shibun ki jaboh jabaiñ ki la sdang ban bun ha ki rud wah jong katei ka Wah, khamtam eh ki bilor kyiad kiba la pynpait dusmon. La ong ruh ba kitei baroh ki dei ki jingleh pathar jong kito kiba ju leit khwai ha katei ka wah, kiba ju mlien ban rah kyiad bad hadien ba ki la dep ban dih, ïa ki bilor kyiad la shu bret kat shaba lap.
Haba ïadei bad katei ka phang na ka liang jong ka synjuk hi baroh kawei, ki la maham tyngeh ba nangne shakhmat yn ym shah shuh ïano ïano ruh kiba leit khwai ha katei ka Wah. Yn ym shah ba kin rah ïa kino kino ki jingdih pynbuaid bad ban shong palat ïa ka por kaba la buh ryntih da ka shnong naduh mynta ka sngi. Kata ka long haduh 4 baje janmiet ha ka por tlang bad 7 baje janmiet por lyiur.
Ha katei ka sngi la ïadonlang u samla Philbak Marshillong Secretary Seng Samla Shnong Tiniang, u Samla Rijit Roy Marshillong Environment Secretary KSU Tiniang Unit bad u bah Kyrshanbor Marshiangbai Sordar Shnong Tiniang bad kiwei kiwei.
