Shillong, Nohprah, 08: U Pope Francis u la kyntiew kyrdan ïa u Archbishop George Jacob Koovakad sha ka kyrdan Cardinal bad u la long u riewniam ba nyngkong eh na ka ri India ban shah kyntiew beit beit sha kane ka kyrdan.
U Archbishop Koovakad, 51 snem ka rta uba la rung sha ka Diplomatic Service jong ka Vatican ha u snem 2006 u dei uba 21 napdeng ki riewniam na kylleng ka pyrthei ban shah pynrung ha ka College of Cardinal ha ka sngi Saitjaiñ ha St. Peter’s Basilica, Vatican City.
U nongaiktien jong ka Balang u Fr. Antony Vadakkekara, u la ong, “ka long ka burom kaba khraw ïa ka Balang Syro-Malabar ba uwei na ki khun jong ka Balang u la shah kyntiew beit beit sha ka kyrdan Cardinal, kaba long ka sien banyngkong eh ha India.”
Haduh mynta, dei tang ïa ki Archbishop la thung Cardinal ha ri India.
U Archbishop Koovakad, uba dei na ka Syro-Malabar Archdiocese jong ka Changanacherry, la kha u snem 1973 ha Thiruvananthapuram. U la shah pynkyntang Lyngdoh Sohblei ha u snem 2004. U la shah hikai pyntbit na ka bynta Diplomatic Service ha ka Pontifical Ecclesiastical Academy bad u la shakri ha ka Apostolic Nunciatures ha Algeria, South Korea, Iran, Costa Rica, bad Venezuela.
Na ka School of Canon Law, u la ïoh pdiang ïa ka Doctorate ha u Jylliew, 2006, halor ka jingthoh ïa ka thesis “The Obligation of Poverty for Secular Clerics in the Codes of Canon Law” bad shwa kane u la ïoh ruh ïa ka kyrdan Baccalaureate ha u snem 2002 bad ïa ka Licentiate ha u snem 2004. U la shakri kum u Assistant Vicar ha ka Parish shwa ban leit sha Vatican.
Hadien ba la pyndep ïa ki jingpynkhreh nadong shadong ha ka Pontifical Ecclesiastical Academy, u la rung sha ka Diplomatic Service jong ka Khet Bakhuid ha u snem 2006.
Ki kam kiba u la trei ki kynthup ha ka Nunciature –Embassey jong ka Khet Bakhuid ha Algeria, nangta kum u Secretary jong ka Nunciature ha South Korea naduh u snem 2009 haduh 2012 bad ha Iran naduh u snem 2012 haduh 2014. Nangta u la shakri kum u Counselor ha ka Nunciatures ha ka ri Costa Rica naduh u snem 2014 haduh 2018 bad ha ka ri Venezuela naduh u snem 2018 haduh 2020, ong ka khubor katkum ka Acta Apostolicae Sedis jong ka Khet Bakhuid.
Ha u snem 2014, u la shah pynkup burom da ka kyrteng Chaplain of His Holiness bad ha u snem 2019 u la shah jer kum u Prelate of Honor ha u Pope Francis.
Katkum ka Khet Bakhuid, ha u Naitung, 2020 u la shakri kum u nongtrei jong ka Secretariat of State bad naduh u snem 2021 u Monsignor George Jacob Koovakad u la long u dkhot jong ka Diplomatic Corps ka Vatican ban peit nadong shadong ha kaba ïadei bad ka jingleit iuhkjat u Pope Francis shabar ri.
U Myntri Rangbahduh ka ri India u Narendra Modi u la pynpaw ïa ka jingsngewkmen ba u Pope Francis u la thung ïa u Archbishop George Jacob Koovakad kum u Cardinal jong ka Balang Catholic na ka ri India.
“Kane ka long ka jingkmen kaba khraw ïa ka Ri India,” ong u Modi.
