Tura, Lber 28 : U Myntri Rangbah ka Jylla u Conrad K Sangma, ula pynpaw ba u don ïa ka jingïohi jngai ban tei ïa ka lawei ba phyrnai jong ki samla pule, kaba don ïa ka jingskhem jingmut, kaba sbun bad ki nongshong shnong kiba don ïa ka jingkitkhlieh ki ban noh synniang shi katdei sha ka imlang sahlang.
Ban pynurlong ïa katei ka jingthmu, u Myntri Rangbah ula pynpaw ba u don ïa ka jingmut kaba skhem ba ka jingïadei lyngba ka jingïakren, ka jinglah ban ai jingkren kaba paka bad kiba don ïa ka nongrim kaba skhem bad ïa ka jingpyrkhat kaba bha ki long kiba kongsan bha, kaba ïa ryngkatlang bad ka jingdon ïa ka kyrdan ha ka pule puthi bad ula banjur ba ka jingïoh ïa ka jinghikai lyngba ka pule puthi kam dei tang ban kiew ha ka jingïoh ïa ka jingnang jingstad hynrei kan tei ruh ïa ka jinglong u briew, ban long kiba skhem jingmut ban ban saiñdur ïa ka sap ha ka jingim jong ki khynnah.
U Myntri Rangbah ula kren ïa katei ha ka SPARK Summit 2025, kaba la long ha ka District Auditorium ha Tura mynta ka sngi Thohdieng.
Kane ka Summit ka dei kum shi bynta jongka jingdap shi snem jong ka prorkam ka SPARK (School Programmes in Articulation, Resilience, and Kindness), ka sienjam kaba la shim da ka tnad pule puthi ka sorkar jylla hapoh jongka Samagra Shiksha.
Ula ong, ba ka sienjam kaba la shim da ka SPARK kala pyni shisha ba ka long kaba suk hynrei ka jingpynleit jingmut ha ka jingïadei lyngba ka jingïakren, ki jingtbit kiba malu mala, ka rukom pyrkhat kaba bha bad ka jingsbun ki lah ban pynkylla ïa ki jingmut jingpyrkhat ïa kiba dang khynnah. Ula ong ruh, ba kane ka sienjam kala pynkup bor ïa ki khynnah pule da ki sap kiba kyrpang ba kin pynkhreh ïa la ka jingim lada ki mad ïa kino kino ki jingtynjuh.
Ula pynpaw ruh ba ka SPARK prokram kala wanrah ïa ki jingkylla kiba lah ban ïohi ha ka jinglong jingman ki khynnah, ka jingskhem jingmut bad ka jingdonbynta ha kaba ïadei bad ka pule puthi ha kylleng ki skul ha ka West Garo Hills. Ula kdew ruh ba kane ka prokram kala ïarap ïa ki khynnah ba kin nang ban kren bha bad ban don ïa ka rukom pyrkhat pyrdaiñ kaba long janai.
Ula pynthikna ba ka Sorkar Meghalaya ka ïengskhem ban pynkhlaiñ ha ka liang ka pule puthi bad kan ïai bteng ban ai jingkyrshan ïa ki jingiaid lynti kiba long thymmai kum ka SPARK ki ban kyntiew ha baroh ki liang ïa ka jingim jong ki riewshimet.
Ula ong ruh, ba ki sienjam kum ka SPARK ki long kiba ïaid ryngkat bad ka thong jong ka Education Policy ka Sorkar Jylla kaba ïar, kaba phaikhmat sha ka jingpule kaba don jingmut, kaba tei ïa ka longbriew manbriew bad ka ban don ïa ka jinglong nongïalam. Ula pynshlur ïa ki kmie ki kpa, ki nongïalam ha ka imlang sahlang bad ki nongïalam shnong ba kin ïashimbynta lang bad ki skul bad ki prokram kum ka SPARK ban pynthikna ba ki jinglong kiba kordor jong ka jingsbun bad ka jinglah ban ai jingkren kaba paka la ka long hapoh ïing ne ha ka shnong ka thaw.
U Myntri Rangbah ula ong ruh, ba ka sorkar kan wad ïa ki lad ki lynti ban nang pynheh ïa ki sienjam jongka SPARK sha kiwei pat ki District, ban pynlong ïa ka kum ka prokram kaban long ka nuksa na ka bynta ban tei ïa ki khynnah pule ha kylleng ka jylla Meghalaya.
Ha kane ka prokram u Secretary bad u State Project Director u Swapnil Tembe, ula ai ïa ka kaiphod treikam jong ka SPARK ha kaba ula pynpaw ruh ïa ki jingseisoh jong kane ka sienjam.
Ha kane ka jingïalang, la ïoh ruh ïaka jingpynsngew na ki khynnah skul bad ki nonghikai halor ka jingshem ka jongki bad ïa ka jingkylla kaba la ïoh lyngba ka SPARK ha ka jingim kaba shimet bad ka jingkiew ha ka pule puthi.
La pynkut ïa kane ka prokram da kaba sam ïa ki Tablet bad ka jingpynkup burom ïa ki Principal jong ki skul, ki nonghikai bad ki khynnah skul halor ka jinglong nongïalam bad ka jingseisoh ka jongki hapoh jong ka SPARK bad la ïoh ruh ïaka prokram ha kaba ïadei bad ka kolshor na ki khynnah pule jong ka Dadenggre Puri Government Higher Secondary School bad Government Girls’ Higher Secondary School, Tura, kaba la nang pynshongkun ïa kane ka jingrakhe.
