Thrang ka MSOA ban kyntiew ïa ka Sohra Marathon kumba long ka Boston Marathon

SHILLONG, Jylliew 27: Ka Meghalaya State Olympic Association [MSOA] ka la pynkhreh biang ban pynlong ïa ka jingïakop mareh-thong ha ka sien ba lai ha Sohra ïa kaba la tip da ka 3rd Sohra International Half Marathon 2024 kaba ju wan ïashimbynta ruh da ki nongïakop mareh kiba na bar ri.
Haba kren sha ki lad pathai khubor hynne ka Sngi Palei, na ka liang jong u Bah John F Kharshiïing-Working President ka MSOA, u la pynshai ba ka jingpynlong ïa ka ‘Sohra Half Marathon’ ka long ban khring ïa ka jingmut jingpyrkhat bad ban kyntiew ïa ka kam jngohkai sha kane ka thaiñ lyngba kane ka jingïakop mareh kaba la ïoh jingmynjur na ka Athletic Federation of India.
Ka MSOA ka la bthah ruh ïa ki paidbah ba ki dei ban don la ka rta ba ki shah ban pynlong ne shimbynta ha kum kine ki jingïakop mareh (Half Marathon) kiba kham jrong bad kyntu ban nym kynthup than ïa ki khynnah rit namar ki dang tlot ha ka bor met bad kim pat long kiba bit ban shimbynta ha ki Marathon kiba kham jngai. Ka rta ka dei ban long palat 16 ne 17 snem, la pynshai u Bah John.
Ka MSOA ka la ai khublei ruh ïa ka tnat Sports jong ka Sorkar Jylla kaba la kular ban kyrshan sa shi sien ban pynlong ïa kane ka Marathon bad na ka liang jong ka synjuk ka khmihlynti ba mynta u snem kin dang bun kiba na bar ri ki ban wan ïashimbynta ha kane ka Marathon.
“Ngi ai khublei ruh ïa ka tnat Sports, sa shi sien ki la mynjur ban kyrshan ha kane ka sien ba lai. Namar Ngi la ïoh ban pynkhreh la bun bnai..Ngi khmihlynti ba kin nang bun shuh kiba wan ïashimbynta kiba na bar,” la ong u Bah John Kharshiïing.
“Baroh ngi tip ba ki don shibun ki Marathon kiba paw ha ka pyrthei, ka jingphohsniew jong Ngi ka long ban kyntiew ïa ka Sohra Marathon ba ha kawei ka sngi kan sa kylla long kum ka Boston Marathon kaba khring ym duna ïa ka shiphew hajar ngut ki briew ba wan ïashimbynta,” la bynrap u Bah John.
Mynta u snem, la rai ban pynlong ïa ka Sohra Marathon ha ka 14 tarik Nailur, 2024 (kaba hap ha ka Sngi Saitjaiñ), la phiah ïa ka thup kyrdan (Category) ha ka Open, Elite ba kynthup ïa ki Combine Indian Athlete bad International bad ruh ka Meghalayan Category, nangta Open ha ka 10k bad kiba la palat ïa ka 50 snem, ban sa ai ïa ki da ka Cash Award.
Kum ka dak jingpynshlur ka MSOA ka la pynkhreh ban ai khusnam kyrpang ïa kiba la palat 50 bad 60 snem shaneng na bynta kito kiba lah ban pyndep ïa jingmareh kaba 21k.
Hadien ka jingseisoh jong ka 5k run ha u snem ba ladep, ka MSOA ka la pynkhreh ban pynlong biang ïa kane ka kyrdan ïakop mareh na bynta kiba la kot palat ïa ka 10 snem, ryngkat ka jingkyrmen ba ki skul bad seng samla ka thaiñ Sohra kin ïashimbyntalang bad ka MSOA. Ha kaba ïadei bad kane, ka jingpynkhreh ka la nang ïaid shakhmat bad ka synjuk ka dang pan jingbit na ka AFI bad ki dang ap mynta ïa ka jingpynbeit.
Ka MSOA ka la pyntip ruh ba mynta u snem ka synjuk ka la rai ban kyntiew ïa ka prize money, ha kaba u\ka nongjop ha ka 21k run la kyntiew na ka 1lak sha ka 2lak, katba ha kiwei pat ki kyrdan yn sa nang pyntip bñiah hadien.