Shillong, Nailar, 09: U Bah Kyrsoibor Pyrtuh, u nongshong shnong jong ka East Khasi Hills District da ka jingsngewkhia u la phah da ka jingthoh sha u Chief Secretary jong ka Jylla u Bah D. P Wahlang halor ka jingshongdum ba khlem bording haduh saw bnai kynthih ha ka shnong Umlakhar, Ri Bhoi District
Ha ka dorkhas u Bah Kyrsoibor Pyrtuh u la ong, “ka snem 2022 ka long ka snem sah kynmaw ba ka Ri India ka rakhe ïa ka jubilee dap 75 snem jong ka jinglaitluid bad ka Jylla ka rakhe ïa ka jingdap 50 snem pura. Ka jingpynkhreh ban rakhe ïa ka jingdap 75 ha ka 15 Nailar ka la ïaid shakhmat bad ki nongshong shnong ki la pynkhreh ban burom ïa kane ka sngi. Ha kajuh ka por ki nongshong shnong ki tip ïa la ka kamram ban niewkor ïa ka jinglaitluid, ïa ki nongïaleh laitluid. Ki tip ruh ïa ka kamram ban burom ïa ka Lama bad ka Riti Synshar ka Ri.”
“Niuma, kaba sngewkthang mynsiem pat ban tip ba ha kane ka khep histori kaba kongsan, ka jingdap 75 snem ka jinglaitluid ka Ri India, ka don kawei ka Shnong ha Ri Bhoi District, kaba kyrteng ka Umlakhar ha kaba ki nongshong shnong ki la shong dum khlem bor ding ekektrik mynta sa ban dap 4 bnai kynthih ha kaba kut jong u Nailar 2022,” u la ong.
“Sa kawei kaba lyngngoh ka long ba ki don ki briew kiba pynbna khubor lamler bad pyntieng kohtympan ïa ki briew ha katei ka shnong ba “kino kino ki iing ki bym sieh lama” kin shah kyntait na ka jinglong trai shnong. Ha kane ka sngi laitluid bad jingrakhe ïa ka jingdap 75 snem ki nong Umlakhar ki donkam ïa ka bor ding ekektrik,” u la bynrap.
“Kumta nga buh hakhmat jong phi ïa kane jingkyrpad ban bthah ïa ka tnat bording ha Ri Bhoi District ban pynïoh mardor ïa ka bording ha katei ka shnong, ban phah tohkit ha ki bor synshar ka Ribhoi District halor ki khubor hamsaïa, ki bym shong nia bad kiba pynkulmar ïa ki briew kiba lui lui,” ong u Bah Pyrtuh.
