Shillong, Nailur 16: Ka seng Voice of the Peoples Party ka VPP ka la thoh sha u Myntri Rangbah ka Jylla u Conrad Sangma ban kyntu ïa u ba ym dei ban ai jingbit ban pynlong ïa ka jingïaid paidbah ne ka Yatra ban khang shoh doh masi kaba la thmu ban pynlong ha ka 2 tarik u bnai ban wan.
Ka Seng ka ong ba ka burom ïa ka jinglaitluid jong ki niam ha ri India kumta la bynshet ha ka riti synshar jong ka ri India, hynrei ka jingngeit niam kam dei pat ban ktah ïa ka hok jong kiwei.
Ka Seng ka ong ruh ba ka ïohi ba kane ka Yatra ka lah ban pynthut ïa ka shongsuk shongsaiñ ha ka jylla namar ba kane ka Yatra ka pynthut bad thmu ban pynbor ïa ka hok jong kiwei ha kaba ïadei ka rukom bam.
Da kaba kyntu ïa u Myntri Rangbah ba ym dei ban ai jingbit satia ïa kane ka Yatra ka Seng ka ïohi ruh ba kane ka jingïaid paidbah ka lah ban wanrah ruh ïa ka jingïasngew pher niam ha ka jylla.
