Shillong, Naiwieng, 12: Ka North East Students’ Organisation (NESO) ha ka sngi Baar ka la thoh sha u Myntri ka Sorkar Pdeng uba khmih ïa ka tnat Pule Puthi u Dharmendra Pradhan ba un shimkhia noh mardor halor ki kynrum kynram kiba la jia ha skulbah North Eastern Hill University (NEHU), bad dawa ruh ban pynhiar shuki ïa u Vice-Chancellor u Prof. P.S Shukla.
Ka NESO kaba long ka shatri jong ki phra tylli ki seng samla pule na kane ka thaiñ Shatei Lammihngi, ka la kyrmen ba lyngba ka jingtuklar jong ka Sorkar Pdeng kan wanrah ïa ka bha ka miat jong ki samla pule ha kane ka thaiñ.
“Ngi la phah ïa ka jingthoh sha u Myntri ka Sorkar Pdeng uba khmih ïa ka tnat Pule Puthi, ban kyrshan ïa ka jingdawa jong ki samla pule ban pynhiar shuki ïa u Vice-Chancellor u Prof. P.S Shukla,” ong u Chairman ka NESO Bah Samuel B. Jyrwa.
Ka seng ka la kyntu ruh ïa u Myntri ka Sorkar Pdeng ban tuklar noh mardor ïa kane ka jingjia khnang ban pynthikna ba ka pule ka puthi ha skulbah NEHU bad hapoh kane ka thaiñ kan ym mad shuh kum kine ki jingshah ktah.
Ka jingdawa ban pynhiar shuki ïa u Vice Chancellor ka long hadien ba ki samla pule ka skulbah NEHU ki la pynlong ka jingïakhih shah thngan kaba khlem pud sngi namar ka jingkuman jong u Prof. Shukla halor ka jingdawa ban wengkam ïa u Registrar u Omkar Singh bad ïa u Deputy Registrar (Academics) u Amit Gupta bad ka jingbym thung shuh ïa ki Pro Vice Chancellor ha Shillong bad ha Tura Campus.
Ïa ka jingïakhih shah thngan ba khlem pud sngi la pynlong da ka NEHU Students’ Union (NEHUSU) bad ba la kyrshan da ka Khasi Students’ Union (KSU) NEHU Unit.
Ki samla pule ki la khangdam ruh ïa ka ka skulbah NEHU kum ka jingpyrshah ïa ka jingleh kuman jong u Vice Chancellor ïa ki mat jingdawa.
Ka NESO ka la kynnoh ba ka jinghiar arsut ha ka kyrdan jong ka skulbah NEHU ka dei namar ka jinghangmei bad ka jingmynthi jong u Prof. Shukla.
“Hapoh ka jingïalam jong u Prof. Shukla, ka kyrdan jong ka skulbah NEHU ka la hiar ar sut na ka 60 sha ka kyrdan kaba hapdeng 100-150, katkum ka jingleh ïa ka jingwad jingtip. Kane ka jinghiar arsut ha ka pule ka puthi ka la pyndiaw bha ïa ka mynsiem jong ki samla pule bad ïa ki nonghikai.
Dang shen, u Vice Chancellor ula khot ïa ka jingïalang jong ka Executive Committee (EC) ka skulbah bad pyntip ruh ba la mynjur ban phah tohkit halor ka jingthungkam ïa u Registrar, ïa u Registrar hadien ba la mih ka jingkynnoh na ki samla pule bad na ki nonghikai ba kim long kiba bit ban trei ïa ka kam.
Ka jingïakhih jong ki samla pule ka NEHU ka la pynlong ruh ïa ki kynhun bapher bapher ban kren halor ki kynrum kynram ba la mih hapoh ka skulbah NEHU.
U Myntri Rangbah ka Jylla dang khyndiat sngi u la pyntip ïa ki jingjia sha u Myntri ka Sorkar Pdeng uba khmih ïa ka tnat Pule Puthi u Dharmendra Pradhan bad kyntu ba un wad ïa ki lad ki lynti ban pynkut noh ïa ki kynrum kynram hapoh kane ka skulbah.
