Thoh ka MSPCB sha ka CPCB bad sha ASPCB ban khmih ïa ka jingjaboh ka lyer ha Bynrihat

Shillong, Ïaïong 03: The Meghalaya State Pollution Control Board (MSPCB) ka la thoh sha ka Central Pollution Control Board (CPCB) bad ka Assam State Pollution Control Board (ASPCB) halor ka jingdonkam ban wanrah ka action plan ban khmih bniah ïa ka jingjaboh ka lyer ha Byrnihat.
“Ngi la thoh sha ka CPCB bad kumjuh ruh sha ka ASPCB halor kane ka kam hynrei ngi dang ap ïa ka jubab na ki,” ïathuh u member secretary ka MSPCB GH Chyrmang sha ki lad pathai khubor ha ka sngi Palei.
“Ngi kwah ïa ka jingïeng pdeng ka bym noh shilliang bad ngi phah ka jingthoh sha ka CPCB ban wanrah lang ïa baroh artylli ki pollution control board jong ka Assam bad Meghalaya khnang ba ngin lah ban ïasyllok bad ban wanrah ki jingshim kam ne action plan ban khmih ïa ka kam jong ka jingjaboh ka lyer,” u la ong.
Haba ïadei bad ka jingshah kynnoh ba ka Byrnihat kaba don ha ka jylla ka la dei kaba shnong ne sor kaba jaboh tam u Bah Chyrman u la ong ba ka board ka dang pynlong ïa ka jingleit jurip manla ka por wat hapdeng ka jingduna jong ki nongtrei bad ka tnat ka la buh ruh ïa ka jingkheiñ bad la shem ruh ba ym tang na Meghalaya hynrei ka jingjaboh ka lyer ka la wan na jylla Assam.
“Ka Assam ka la sdang ban shim kam hadien ba ïa kane ka jingeh la pynpaw da u Myntri Rangbah ka jylla. Ngi kmen naba ngi la shim kam ïa ki karkhana kiba don ha ka jylla hynrei ka long pat kumba leh shilliang naba ngim lah ban shim kam ïa kiwei pat ki karkhana kiba don ha Assam kiba ïaibteng ban pynkheiñ ïa ki kyndon. Lada baroh artylli ki jylla ki ïatreilang ngin lah ban kynjoh ïa ka thong,” u la bynrap.
U Bah Chyrmang u la pyntip ba na ka liang jong ka board shen kan sa pyllait ïa ka kaiphod halor ka jingwand bniah ba la leh da ka National Environmental Engineering Research Institute (NEERI). Katkum ka jingong jong u, u la ong ba na ka jingkhmih bniah ka pynpaw ka jingjaboh ka lyer kam dei tang na ki karkhana hynrei na ki kali, ki jingthang khlaw bad na ki surok nalor kiwei kiwei pat.
U la ïathuh ruh ba na ka daw jong ka jingbym lah ban buh jong ka board ïa ki ophis ha ki district bapher bapher ka la long kawei na ki jingeh kiba mih na ka jingjaboh ka lyer ha Byrnihat.
Ha ka 28 tarik u Lber, u Myntri Rangbah ka Assam u Himanta Biswa Sarma u la pynthikna ban ïatreilang bad ka sorkar Meghalaya ban ïakren halor ka jingjaboh ka lyer ha Byrnihat.
Lah ban ong ba ha ka 13 tarik u Lber, u Myntri Rangbah ka jylla u Conrad K Sangma u la pynthikna hapoh ka dorbar mang tyngka ba un sa wanrah ïa ka joint action plan ka ban don bynta lang da ka Meghalaya bad Assam ban ïasyllok ruh halor kane ka kam kaba ïadei bad ka shnong Byrnihat.
“Ngin ïaleh ban pynbha ïa kane ka kam bad ban pynduna ïa ka jingjaboh jong ka lyer ha kane ka jaka,” u la ong da kaba bynrap, “Namar kata nga pynthikna ïa ka ïing ba kan sa don ka joint action plan hadien ba ngi la lah ban ïakynduh hapdeng ka jylla Assam bad Meghalaya.”