Shillong, Jylliew 25: Kumba ka long mynta ba naduh ba ka jylla ka la pyntreikam ïa ka Roster System ha ka jingthungkam ha ki kam sorkar baroh ka la don hapdeng ka jingkhmih bniah ban pynthikna ba ki paid riewlum ka jylla kim dei ban duh ïa ka hok ka jong ki kumba la bhah.
Ha kaba ïadei bad kane na ka liang jong ki paid Garo ki la pynpaw ïa ka jingbitar ba mynta halor ka jingthungkam ba dangshen, kaba la saphriang ruh ha ki social media, ha ka kam Assistant Auditor (Assistant Audit Officer) jong ka Administrative Control jong ka Directorate of Local Fund Audit, Meghalaya, namar ka jingsngew ba ka don ka jingleh bym hok halor ka bhah ba ki dei ban ïoh.
Ki jaitbynriew Garo ki don ïa ka jingsngewkhia halor kane ka rukom thungkam namar tang 4 ngut ki samla Garo ki la shah thungkam na ka bhah kaba kidei ban ïoh 7 ngut na ki 18 tylli ki kam kiba lait. Ha kawei pat ka liang ki jaitbynriew Khasi-Jaiñtia ki la shah thungkam ha baroh 8 tylli ki kam kiba la bhah na ka bynta ka jong ki.
Ki la don sa 3 tylli ki post kiba dangsah ban thung ïa ki jaitbynriew Garo, kaba ka Meghalaya Public Service Commission (MPSC) kam shym la lah ban thep lut ïa ki Garo. Ki la pynpaw ba kane ka jingleh kadei kaba la leh shilliang khmat bad kadei ka jingthmu ban pynrungkam tang khyndiat ngut eh ïa ki Garo ha ki kam sorkar.
Ka Meghalaya Public Service Commission (MPSC) ka la ‘pynmih ïa ka jingpynbna ba lait kam haduh 18 tylli ha ka kyrdan Assistant Audit Officer ha ka 21 tarik u Nailar 2023, ïa kaba dei ban ïaid katkum ka roster system ka jylla. Kumta 8 tylli ki Post la bhah bad leit sha ki Khasi-Jaiñtia, 7 tylli ïa ki Garo bad kawei na ka bynta ki Other Scheduled Caste (OSC) bad Other Schedule Tribes (OST) jong ka jylla bad 2 tylli la bhah na ka bynta ka Unreserved Category.
Hynrei haba la pynbna ïa ka result ha ka 14, Lber 2024, tang 4 ngut na ka jaitbynriew Garo ki la mih kyrteng ha ka thup ïohkam bad kam shym la mih kyrteng eiei na ka OSC bad OST. Haduh 8 ngut ki la mih kyrteng na ka Khasi-Jaiñtia bad 2 ngut ha ka Unreserved Category.
Ka MPSC ka la pynshai ha ka result ba dei tang 4 ngut na ka jaitbynriew Garo kiba dei hok ban ïohkam bad ym shym la kynthup mano mano ruh na ka OST bad OSC category.
Ki jaitbynriew Garo ki la pynpaw ïa ka jingsngew diaw halor katei ka result namar ka jingbym shym la pyndonkam lut ïa ka bhah ka jong ki.
Ki tyllong khubor na ka sorkar kiba tip bha ïa ka jinglong jingman ha ka rukom thungkam, ki la pynpaw ba ki jaitbynriew Garo kim dei ban khuslai namar ba ïa kitei ki kam kiba lait yn sa advertise biang sa shisien.
Ka State Reservation Policy, 1972 ka la kdew shai ba lada don kano kano ka jingduna ne jingbym biang ha ka rukom bhah, yn sa rah biang ïa ka sha u snem ban wan.
Ha ka Clause 2 jong ka Meghalaya State Reservation Policy, 1972 la kdew, “Lada ym lah ban pyndap ïa ka bhah thungkam ïa ki kyrtong na ki Jaitbynriew ba ïoh bhah, ïa ka kam kaba dang lait lah ban pyndap noh da kiwei pat. Hynrei lada don pat ka jingduna na ki Scheduled Tribe bad Schedules Caste, ïa kane ka kam ba lait yn sa rah pat sha uwei u snem thungkam tangba ïa kane ka bhah ym dei pat ban rah palat ïa ka shisnem. Hadien ka jingkut noh jong u snem baar, ïa kitei ki jingbhah la lah ban pynkut noh. La rai ruh ba kam dei ban don kano kano ka por ba ka nombar jong ka ‘Normal Reserved Vacancies’ bad ‘Carry Forward’ kin tam pat ïa ka 90 percent ha ka jingdon jong baroh ki kam kiba lait ha uta u snem”.
