Shillong, Jylliew 25: Ki Pulit ka Anti-Infiltration Directorate ki la pynlong ïa ka jingkhynra ïa ki nongbylla bar jylla kiba khlem kot khlem sla ha ka thaiñ Nongmensong bad Mawpat.
Ki nongbylla bar jylla, kiba bun ki dei na Assam, ba bylla ha ki jingtei bapher bapher, la bthah ba kin pyni ïa ki kot ki sla kum ka Labour Licence, Aadhaar bad EPIC.
Ha kaba ïadei bad kane ka tyllong khubor ka ïathuh ba ki Pulit, ki la lap ba don haduh 15 ngut kiba khlem kot khlem sla ha kane ka jingkhynra.
Ka Heh Pulit ka Directorate ka la maham ïa ki nongbylla bar jylla ba khlem kot khlem sla ba kin shah pynphai biang sha ka Jylla ba ki wan.
Haba ïaroh ïa kane ka jingpyrshang ka Directorate ban bat ïa ki nongbylla bar jylla, ka KSU ka la ong ba ka jingkhynra khlem da pan ïa ka work permit kan long leh noh eiei namar kane ka aiñ ka dei kaba khang ïa ki nongbylla ban sah hapoh ka Jylla.
“Kumta, ngi kyntu ïa ka Anti-Infiltration Directorate ban bthah ïa ki nongbylla bar jylla bad ki contractor ba aikam ïa ki, ba kin pyni ïa ki work permit lem kumta kin shah pynphai biang lane shah pynshitom katkum ki aiñ,” ong u samla Donald V Thabah, General Secretary ka KSU ha ka kyrwoh.
Ha kawei ka liang, u samla Donald ula ong ba ka KSU ka kwah ban kylli ïa ka Sorkar Jylla halor ka jinglong jingman jong ka Meghalaya Residents Safety & Security Act (MRSSA) 2016.
“Kaei kaba khang ïa ka Sorkar Jylla ban pyntreikam ïa ka MRSSA haba ka Sorkar Pdeng lyngba ka Ministry of Home Affairs (MHA) ka la pynphai pat ïa kane ka aiñ sha ka Sorkar Jylla,” ula buh jingkylli.
Ha kaba ïadei bad kane une u Nongïalam ka KSU ula ong ba ka Union kan sa wad ïa ki daw ha shwa ba kan shim ïa ka rai ban pynbor ïa ka Sorkar ba kan pyntreikam noh mardor ïa kane ka aiñ.
“Ka KSU ka kwah ruh ban pynkynmaw ïa ka Sorkar MDA, ïoh ba ka klet, ïa ka jingdonkam ban buddien khlem shongthait bad ka Sorkar NDA halor ki jingdawa ba sahteng ban pyntreikam ïa ka ILP, ban pynrung ïa ka ktien Khasi ha ka khyrnit ba phra bad kiwei kiwei,” ula bynrap.
