Thmu ka sorkar ban wan ïalam noh ïa ki 22 ngut ki khynnah skul ba ngat bih ha Mandya

Shillong, Lber 21: Ka sorkar jylla ha ka sngi Thohdieng ka la pyntip ba la thmu ban wan ïalam noh ïa baroh ki 22 ngut ki khynnah skul kiba la kem pang na ka jingngat bih na ka jingbam ha Mandya, jylla Karnataka, ïa kane la ïathuh da u Commissioner & Secretary ka tnad Home (Police) u Bah Cyril Diengdoh ha ka sngi Thohdieng.
Ha kaba ïadei bad kane haba ïakren bad ki nongthoh khubor, u Bah Cyril ula ong, “Ka jingthmu ka long ban wan ïalam noh ïa ki sha Jylla Meghalaya.”
“Hynrei, kine ki khynnah skul ki dei kiba shong klas bapher bapher- don kiba shong klas V bad don kiba shong klas VII, bad ki hap ban ïakhun ïa ka eksam lem kumta kin duh ei ïa kane ka shisnem. Kumta, u DC ka Mandya ula pyrshang ban pynbeit ba kumno kine ki khynnah skul kin ïoh ban ïakhun ïa ka eksam bad kane ka dei kaba ki la pynpaw ruh bad khlem pep ki bor District ki la kren ïa ki Kmie Kpa bad hadien ba pyndep ïa ki kam ki jam katkum ka aiñ, ngin sa wanrah noh ïa ki sha Jylla,” ula bynrap.
Haba kylli, u Bah Cyril ula ong, “Kat haduh mynta ka sngi, nga dang ïakren bad u Deputy Commissioner ka Mandya District. La pyntip ba ki khynnah ki dang don ha hospital bad la shimkhia ban khmih ïa ki da ki bor khmih ka Hospital. Ka Child Welfare Committee jong ka District ruh ka la ïakren bad ki bor hospital khnang ba kin pynbiang ïa baroh ki jingdonkam jong kine ki khynnah”.
U Bah Cyril u pyntip ba ki Deputy Commissioner ha Meghalaya ruh la bthah ba kin pynlait noh ïa ka pisa ba mar T. 3 lak sha ki bahaïing hasem jong ki arngut ki Khynnah skul, kiba khlad noh namar ka jingïoh bih na ka bam ha kine ki sngi ba la leit.
U Bah Deingdoh uba dang wan phai dangshen na Karnataka, ula pyntip ruh ba ki bor District bad ki Pulit ki la dep ujor da ka ejahar bad hynriew ngut ki briew ki la shah kem kynthup ïa u briew ba pynïaid ïa ka skul bad ïa ka hostel beaiñ, u trai ka restaurant bad u cook.
U la bynrap, “Ka jingtohkit kan ïaid katkum ka lynti jong ka aiñ. Ïa ka ejahar la dep ban register bad ka aiñ kan ïaid ha la ka jong ka lynti.”