GUWAHATI, Lber 22: Ka NorthEast United FC ka la pynbna ba u head coach jong ka kynhun, kata u Juan Pedro Benali, u la soi ïa ka jingïateh ba thymmai ban pynjlan ïa ka kontrak sa ar snem ka ban pynsah ïa u bad kane ka klob ISL haduh ban da kut ka samoi ïalehkai 2026-27.
U Benali, uba la pynïasoh bad kane ka klob ha u Jymmang 2023, u la wanrah ïa ka por jong ka jingkylla na bynta ka NorthEast United FC. Ka rukom treikam jong u ka long kaba jylliew bad kaba la wanrah jingkylla bha ïa ka kynhun, ha kaba u la ïalam ïa ka kynhun ban kiew sha ki kyrdan kiba ym pat ju ïohi mynno mynno ruh. Haba shimti ïa ka kam ha ka sien ba nyngkong, u la lah ban ïalam ïa ka NEUFC sha ka semi-final jong ka Durand Cup bad ka kynhun ka la duna noh da tang shi poin ban rung sha ka ISL playoffs, kaba la buh ïa ka nongrim kaba skhem ïa ka kynhun na bynta ka jingjop ki ban sa wan.
Ha kane ka samoi ïalehkai ba mynta la sakhi ïa ka jingkylla kaba khraw hapoh ka jingïalam jong u Benali. Ka klob ka la ïoh ïa ka burom kaba khraw da kaba rah ïa ka nam lahduh jong ka Durand Cup – ka trophy nam lahduh ba nyngkong ha ka histori jong ka NorthEast United FC. Shuh shuh, kane ka kynhun ka la pynthikna ruh ïa ka jaka kaba ki angnud na bynta ka jingïalehkai playoff ha ka Indian Super League (ISL) hadien saw snem, kaba pyni ïa ka jingnangkiew jong ka klob bad ka jingpynurlong ïa ki jingangnud jong ki nongkyrshan ha kylleng ka thaiñ shatei lam mihngi. Ka NEUFC ka la pyndep ha ka kyrdan ba saw ha ka miej kamai poiñ jong ka ISL bad ka ïoh ïa ka kabu ba paka ‘hala ïing’ ban ïakhun ïa ka playoff.
Ha ka jingshisha, ka kontrak jong u Benali ka kynthup ïa ka jingpynjlan por kaba la pynïadei bad ka jinglah ban ïalehkai ha ka ISL playoff. Hynrei ka jingthmu na ka bynta ka jingroi bad jingshong shngaiñ kaba kham slem bad kaba thikna, baroh ar ka klob bad u Benali ki la mynjur ïa ka jingïateh kaba thymmai ban pynjlan sa ar snem, kaba pynskhem ïa ka jingangnud jong ki ban tei ïa ka pateng kaba lah ban ïaineh bad kaba skhem.
Na ka liang jong u John Abraham, trai jong ka NorthEast United FC, u la ïaroh ïa ka jinglong nongïalam jong u Juan bad u la pynpaw ïa ka jingkmen jong u halor ka rai jong utei u Manager ban dangsah bad ka kynhun.
“Nga sngewkmen ba u coach ba head coach jong Ngi u Juan Pedro Benali u la soi ïa ka kontrak ba thymmai bad ka klob. Ka rukom ba u Juan u la tei ïa kane ka kynhun ka long kaei kaei kaba dei ban ïaroh da ka jingangnud jong u na ka bynta ban pynbha bad na bynta ka jingjop. Ngi don ka jingthmu na ka bynta ka klob bad hapoh ka jingïalam jong u Juan, Ngi ngeit ba Ngi lah ban tei ïa kaei kaei kaba don jingmut ha NorthEast United FC,” la ong u Abraham.
“Nga don shisha ka jingsngew kaba kyrpang na bynta kane ka klob phutbol. Ngi don ka jingthmu kaba shai ïa kaei kaba nN kwah ban tei ha kane ka klob ryngkat u John bad u Mandar. Hadien ar tylli ki samoi, Nga sngew kumba Nga don hala ïing ha NorthEast United FC, ryngkat bad ki rangïalehkai kiba sngewtynnat, ki coaching staff bad kiwei kiwei ki nongtrei. Ngi dei kawei ka longïing kaba heh, Ngi ïaid sha ka lynti kaba dei bad ryngkatlang Ngi lah ban tei ïa kaei kaei kaba don jingmut ha NorthEast kaba ki nongkyrshan kin sngew sarong,” la pynpaw u Benali.
U Mandar Tamhane, CEO jong ka NEUFC, u la ban biang ïa ka jingkren jong u Abraham, da kaba pynksan ïa ka jingdonkam jong ka klob ban bteng bad pynneh ïa ki dkhot ka kynhun kiba la don lypa. “Ka jingbteng ka dei u Mawsiang jong ka projek jong Ngi ha NorthEast United FC. Ka jingpynjlan ïa ka kontrak jong u Juan ka long ka rai kaba suk. Ka long ka jingpynpaw ïa ka jingaiti jong Ngi ban bteng bad ka jingthmu jong Ngi ban pynkupbor ïa ki samla. Ngi ngeit ba kane ka projek kaba jrong kan don ka jingktah kaba jylliew bad kaba neh ha ka roi ka par jong ka phutbol ha ka thaiñ shatei lam mihngi jong ka ri bad ka phutbol India baroh kawei,” la ong u Tamhane.
