SHILLONG, Nailur 11: Ka Mawryngkneng SC bad ka Pomlakrai SC ki ar kynhun kiba seisoh ha ki jingïakhun ba la long ha ka Sngi Balang (11 tarik Nailur, 2024) jong ka lympung Third Division 2024 ba la pynïaid da ka Shillong Sports Association ha madan SSA Stadium, Polo, hadien ba ki la khur ïa ka jingjop.
Na ka liang jong ka Mawryngkneng SC ka la pynliem salit da 1 kol ïa ka Nongumlong SC, katba ka Pomlakrai SC ka la jop da 2-1 kol ïa ka Lapalang SC.
Ka shi kol na u Baiehbok Sari ha ka minit ba 54 ka la biang pura ïa ka Mawryngkneng SC ban pynliem ïa ka Nongumlong SC bad ban khur shalade ïa ki lai point ba pura.
Katba ha ka jingïakhun hapdeng ka Pomlakrai SC bad ka Lapalang SC, ka Pomlakrai SC ka la pynkhih ar kol lyngba u Meshai Tariang (10 minit) bud sa ka kol na u Macdonald Kurkalang (19 minit). Ka Lapalang SC ka la pynïakhaid lyngba u Dilang Wardkar ha ka 47 minit.
Ki jingïalehkai ha kane ka Sngi Palei (12.09.2024), ka jingïalehkai ba nyngkong ha ka por 12:30 baje mynsngi hapdeng ka Nongmensong SC pyrshah ïa ka Kharang SC, nangta kaba ar ha ka por 3:30 baje nohphaisngi hapdeng ka Iaityllilang SC pyrshah ïa ka Lumparing SC. Baroh ki jingïalehkai yn pynlong ha SSA Ground, Polo.
