Thied ka Sorkar tang u synsar shi nombar, khlem myntoi ka CM Assured Scheme, ong ki nongrep

Shillong, Lber, 18: Ki nongtrei jong ka Mawryngkneng C&RD Block ha ka sngi Baar ki la hiar sha ka shnong Mynriang East Khasi Hills District ban rejistar ïa ka CM Assured Scheme na ka bynta ki nongrep synsar hadien ba ki nongrep dang ha kine ki khyndiat sngi ki la pynpaw ïa ka jingsngew suhsat namar ka jinghiar dor shaba palat u synshar ha kane ka aiom.
Hynrei kaba pyndiaw mynsiem mynta ïa ki nongrep ka long ba ki nongtrei jong ka Mawrynkneng C&RD Block ki shim beit tang ïa u synsar uba dei u shi nombar ne Grade-A katba ïa u synsar uba dei u ar nombor ne lai nombor la kyntait noh mardor.
U nongrep synshar na ka thaiñ Mynriang, Bah Jylliew Jingmut Lyngkhoi ha u kyrwoh ba la phah ryngkat ki dur bad ki video u la ïathuh ba ki nongrep ki la pynpaw ba kam don jingmut satia ban register ha ka CM Assured Scheme lada ka Sorkar kam lah ban shim lut ïa u synsar naduh uba bha haduh uba kham sniew. Ki nongrep Synsar ki la kyntu ïa ka Sorkar ba kan shim lut ïa u mar lehse shu pynïapher noh ïa ka dor hapdeng u synsar shi nombar bad uba kham sniew.
Ki nongrep ki la pynpaw ruh ka jingeh ha kaba ïadei bad kane namarba ki hap bud ïa ki kyndon bapher bapher ban register ïa kane ki nongrep synsar ki la pynpaw ïa ka jingduh jingkyrmen lada ka long kumne kam myntoi ban register ïa lade ha kane ka Scheme, u la ong.
U la pynpaw ruh ha ka jingshisha ki nongrep synsar ki la pynpaw ïa ka jingsngewkmen halor kane namarba ka Sorkar la rah ïa kane ka jingeh jong ki nongrep hapoh ka Dorbar Mang Tyngka jong ka Iingdorbar Thawaiñ ka Jylla hynrei phewse ynda la batai ban register ïa ka CM Assured Scheme kam ïadei shano shano katkum ka jingkwah bad ka jingangud jong ki nongrep.
Shuh shuh u la ong ba ki nongrep synsar ha kane ka sngi ki la pynpaw ruh ka jingeh ba mynta ka aiom ka long ka por kaba ki marrep kim don iew katba kaba hap thied na iew pat baroh ki mar ki mata ki kiew dor.
“Lada ka long kumne hangno ka lawei jong ngi ki nongrep kan poi haba u mar uba ngi rep hi ngi shah khñiot bad ki mar kiba wan nabar kum ki jhur ki jhep ki nang kiew dor. Ngi kyntu ïa ka Sorkar ba kan shimkhia lem ïa kane ka jingeh jong ngi lada phi kwah ban kyntiew ïa ka ïoh ka kot ha jylla,” la bynrap shuh shuh u Bah Lyngkhoi.