Nongpoh, Naitung 27: Uwei u rangbah briew u la khlad noh marwei katba u dang leit ot phlang na ka bynta ki jingbam masi bad ïa kane la tip hadien ba la wan ujor da uwei u rangbah ba une u nongri masi u la leit ban ot phlang naduh ka por 8.30 baje mynstep bad dei namar ba um wan phai shuh sha la ïing wat ha ka por janmied ba la leit pyntip noh sha ki bor pulit ka Byrnihat da utei u rangbah.
Une u rangbah u ba la pyntip sha ki bor pulit u dei u Janardhan Khadal na ka shnong 12 mer ha Ri Bhoi bad utei pat u rangbah ba la khlad noh la tip kyrteng kum u Karna Bahadur ha ka rta kaba 62 snem.
Katkum ka tyllong khubor ba la ïohlum, la ong ba ki bor pulit ryngkat kiba haïing ki la leit wad ïa une u rangbah ha ka por 4 baje janmied, hadien ba la wan pyntip sha ki bor pulit ka Byrnihat Police station. Ha ka jingleit wad la lap ba u la khlad noh bad la thiah lyngktar ha katei ka khlaw.
La ong ruh hadien ba la lap ïa ka met jong une u rangbah, la pynlong ïa ka jingtohkit bad la suba ba une u rangbah u la khlad noh na ka daw ka jingtied sted palat u klongsnam (Heart stroke).
Ki pulit ki la ïathuh ruh ba ha ka jingtohkit ym shym la lap satiaba don kino kino ki dak mong bad lait noh tang ka jingplei snam na ka khmut kadiang jong u.
Shuh shuh, la ong ruh ba hadien ba la pynlong ïa ka jingtohkit la rah noh ïa ka met jong une u rangbah sha Civil Hospital Nongpoh ban pyndep ïa ka postmortem examination khnang ban tip ïa ka daw tynrai jong ka jingïap une u rangbah bad mynta ka sngi ym shym la lah ban pyndep ïa ka postmortem examination na ka daw ka jingbym don bording ilektrik ha katei ka kamra ba leh postmortem, ong ka tyllong khubor na ki Pulit ka Ri Bhoi.
