Ther u heh ka Cong ïa ka NPP bad BJP ba heh tang ka ktien khlem ka kam halor ka ktien Khasi

Shillong, Risaw 22 : U President jongka Congress bad u MP jongka Shillong Parliamentary Constituency u Ma Vincent H Pala u la ther tyngeh ïa ka National People’s Party (NPP) bad ïa ka Bharatiya Janata Party (BJP) ba ki heh tang ka ktien khlem ka kam halor ka jingpynrung ïa ka ktien Khasi bad Garo ha ka Khyrnit ba Phra jongka Riti Synshar ka ri India.
“ Kane ka sorkar ka shu kular tang ka ktien ban ïakhun ban pynrung ïa ka ktien Khasi ha ka Khyrnit ba Phra ha ka jingshisha lada ki shim khia ki lah eh namar ka NPP ka ïatrei lang bad ka BJP naduh sorkar jylla haduh sorkar pdeng. Da kaba suk ka NPP ka lah ban pynbor ïa ka BJP ban ithuh noh ïa ka ktien Khasi” ong u ma Pala.
“Nalor kata wat ka BJP ruh ki la buh ïa kane ka mat ban pynrung ïa ka ktien Khasi bad Garo ha ka Khyrnit ba Phra kum kawei na ki mat ha ka Manifesto Election jongka” ong biang u ma Pala.
U la ong kane ka sorkar MDA ka la shu kular tang ka ktien katba ka kam pat ka khlem leh ka la shu thok shu shukor ïa ki paidbah.
U la ong ba ka Ktien Khasi lei lei ka dei kawei na ki 38 tylli ki jait ktien kiba don ha ka list ban ïoh ka jingithuh. “ Lada ka BJP ka shim khia shisha ban ithuh ïa ka ktien Khasi ka lah ban leh da kaba suk namar na ka liang ka Sorkar, ka Khasi Authors Society bad kumjuh na ka liang jong ngi ruh ki ïai tynruh ban ithuh noh ïa ka ktien Khasi hynrei ym tip pat balei ba ka sorkar kam ïai shim khia ban pynbor ïa ka BJP ban pynurlong ïa kane ka jingthrang jong ki paidbah” pynkut u ma Pala.