Nongstoiñ, Nailar, 02: Namar ba ka sorkar kam shym la mang pisa na ka bynta ban pynheh bad shna pynbha ïa ka surok na Mawpeiñ lad Mawkyrwat shaduh Anderson Higher Secondary School kaba don tang kumba shi kilomitar tam ei ei, kaba dei ruh ka surok kaba hapdeng sor Nongstoiñ ka la wanrah ïa ka jingdheng kali kaba jur khamtam ha ki sngi ïew.
Kumta ki nongïalam ka FKJGP Nongstoiñ circle ba la synran lang da ki nongïalam ka West Khasi Hills District Unit ki la hiar ban jurip bad ki la lap ba katei ka surok ka la donkam ban kham pynheh bad kham pynbha shuh shuh namar ka dei ha pdeng sor.
U samla Ananstar Peiñlang vice president ka FKJGP Nongstoiñ circle haba ïakren bad ki nongthoh khubor hadien katei ka jingleit jurip, u la ong ba haba peit ïa ki kali bad ki paitbah kiba ïaid ba ïeng na katei ka surok la isangsot khamtam ha ka por slap namar ka la sniew shaba palat.
U la ong ruh ba lada dei ha ka por slap katei ka surok kam don jingïapher ei ei shuh na ka wah Nonbah bad teng teng ka la kham palat ruh. Haba ki paitbah ki ïaid na ka lynti kjat na sha rud ruh lada dei ha ka por slap lada don ki kali kiba ïaid bun kiba shah synreit um ktieh ha ki shaka kali.
Utei u nongïalam u la ong ruh ba ka seng ka sngew lyngngoh bha ha kaba ïadei bad ka jingbym lah jong ka sorkar ban mang pisa tang na ka bynta ka shi kilomitar. Na ka liang ka seng ka sngew artatien bha namar ki dak ki shin ki la paw ha ki snem ba la dep ha ka jingpynbha bad pynheh ïa ka surok Nongstoiñ sha Sohpian kaba hynñiew kilomitar, ba ka sorkar ha ka jingpynbna paitbah ka la ong ba ka dei ka Intermediate Lane. Hynrei ynda la shna pat ka dei pynban da ka foot path lane kaba wat tang ar tylli ki kali rit ruh ym long ban ïaid namar ka la kham rit ban ïa ka surok rim kaba mynshuwa.
Nalor kata u la ong ruh ba ka long kaei kaei kaba sngew biej ba tang ïa ka surok kaba shi kilomitar bad kaba dei ruh ka town road la hap ban tuklar da ki sengbhalang. Lada ka long kumne ka pyni shai kdar ba ki nongmihkmat ki dei shisha ki ba matlah bad kiba kyllut bad ki bym don jingkitkhlieh na ka bynta ka jing myntoi jong ki paitbah nongshong shnong.
U la ong ba ka seng kan sa leit ban ïakynduh ïa u Myntri ka tnad PWD ba u dei ban shimkhia bad rah ïa katei ka mat sha ka sorkar, ba kan leh ei ei noh kham kloi bad lada ka sorkar kam patiaw ïa ka jingdawa ka seng kam banse ban ïaid da kawei pat ka lynti.
