Shillong, Jymmang, 20: Ki paidbah nongshong shnong ka shnong Sohiong, ka shnong kaba hap hapoh u pud u sam jong ka East Khasi Hills District ki la pyneh beit triang ban shah khynniat sha distrik ba dang shu plie thymmai da ka Sorkar Jylla ka Eastern West Khasi Hills District.
Katkum ka dorkhas ba la aiti da ka Dorbar Shnong Banglasohphie kaba hap ha ka Hima Sohiong sha ka Ophis jong ka Deputy Commissioner ka East Khasi Hills District, ka Dorbar Shnong ka la pyntip ki paidbah nongshong shnong ki la ïakynduh jingeh ha kaba ïadei bad ki kam ophis bad kiwei kiwei de ki kam na ka daw ba ka Electoral Photo Identity Card (EPIC) jong ki nongshong shnong la pynngat sha Mairang Constituency, Eastern West Khasi Hills District katba ïa ki skhim jingmyntoi pat ki dang ïoh beit na Sohiong Constituency, East Khasi Hills District.
Ha kane ka dorkhas, ka Dorbar Shnong ka la pyntip ba ka khanasamari ka dang hapoh ka Sohiong C&RD Block, ka Rational Crd ki dang ïoh na ka Ophis jong ka Deputy Commissioner ka East Khasi Hills District, ka Job Card ki dang ïoh na Sohiong C&RD Block, ka ICDS ki ïoh na ka Ophis jong ka Social Welfare Mawphlang East Khasi Hills District, ka Banglasohphie SSA LP School ka dang hap hapoh ka jingpeit jong ka ophis jong u Sub Divisional School Education Officer, ka East Khasi Hills District, ka skhim PMAY ki dang ïoh beit na Sohiong C&RD Block bad kiwei kiwei de ki jingmyntoi ki ïoh beit haduh mynta na East Khasi Hills District.
“Ka jingpynhap ïa ka shnong sha ka Eastern West Khasi Hills District ka dei tang ïa ka EPIC. Na kata ka daw ngi ki paidbah nongshong shnong ngi ïakynduh shibun bah ki jingeh halor kane ha ka por ba ngi hap ban pyndap ïa ki kot ki sla kiba ïadei bad ki kam ophis bad kiwei kiwei de ki kam,” la ong ka Dorbar Shnong ha ka dorkhas.
“Ngi kyrpad rit ïa phi ban pynkynriah noh ïa ka EPIC jong ngi ki nongshong shnong baroh sha Sohiong Constituency, East Khasi Hills District,” ong ka Dorbar Shnong ha kane ka dorkhas sha ka Deputy Commissioner.
Ka Dorbar Shnong ka la pyntip ruh ba kane ka jingkyrpad ka dei kaba la shim na ka jingïasoi paidbah kaba la long ha ka 19 tarik Ïaiong, 2022.
Ïa ki nongïalam ka Dorbar Shnong ka Banglasohphie la synran lang da ki nongïalam jong ka Joint Action Committee ki khun ki hajar ka Hima Sohiong.
