Thaw u Amit Shah da ka Komiti ban bishar ïa ki jingdawa ki 10 ADC na NE halor ka Sixth Schedule
Shillong, Naitung, 25: U Myntri ka tnat Kam Pohing ka Sorkar India u Amit Shah u la thaw da ka komiti ka ban khlieh da u Myntri Khynnah ka tnat Kam Pohing ban bishar bniah ïa ki jingdawa bapher bapher ba la pynsngew da ki 10 tylli ki Autonomous District Council (ADC) na kane ka thaiñ Shatei Lammihngi ka ri India.
Na Meghalaya, baroh lai ngut ki Chief Executive Member ka Khasi, Jaiñtia bad Garo Hills Autonomous District Council ba kynthup ïa u Bah Pynïaid Sing Syiem, u Bah Thombor Shiwat, u Albinush Marak ki la leit ïashim bynta ha ka jingïalang bad u Myntri ka tnat Kam Pohing ba la lamkhmat da u Chairman jong ka TIPRA Motha u Pradyot Bikram Manikya Deb Barma.
U Chief Executive Member (CEM) jong ka Khasi Hills Autonomous District Council (KHADC) u Bah Pynïaid Sing Syiem ha ka jingïakren bad ki lad pathai khubor ha nongbah New Delhi hadien ka jingïakynduh kaba shiteng kynta bad u Amit Shah ha ka sngi Palei u la ong, “ngi la ïakynduh ïa u Amit Shah ha ka jingïalang kaba la neh kumba shiteng kynta ban ïa pynsngew bad ban pynpaw ïa ka jingdonkam jong ngi ha kaba ïadei bad ka jingpynbeit thymmai ïa ka Khyrnit Bahynriew jong ka riti synshar ka ri India.”
“Ïa ki jingeh bad ki jingdawa jong ngi, u Amit Shah u la pynsngew ha ngi ba hapoh shibnai, kata, hapoh ka 25 tarik Nailar, 2024 yn sa pyndep ïa kane ka kam ban bishar bniah da kaba yn thaw ruh da ka Komiti ïa kaba yn sa khlieh da u Myntri Khynnah ka tnat Kam Pohing u Nityanand Rai ban sa bishar ïa ki jingdawa jong ki 10 tylli ki ADC na ka thaiñ Shatei Lammihngi,” la ïathuh u Bah Syiem.
“Ngi ai khublei kyrpang ïa u Myntri ka tnat Kam Pohing uba la sngap bad uba la shimkhia ïa kane ka kam ha kaba ïadei bad kane jingpynbeit thymmai ïa ka Khyrnit Bahynriew. Ngi kyrmen skhem ba kine baroh ki jingpynsngew jong ngi ha kaba ïadei bad ka jingpynkhlaiñ ïa ki Autonomous District Council ha kane ka thaiñ Shatei Lammihngi, khamtam ha ka Jylla Meghalaya ba lyngba ka jingwanrah ïa ka jingpynbeit thymmai kan long ka jingmyntoi bad ka jingkyrkhu kaba khraw,” la ong shuh shuh u CEM ka KHADC.
U Bah Syiem u la ïathuh ba ki 10 ngut ki khlieh jong ki ADC kin sa ïakynduh biang ha ka sien kaba ar ha nongbah Shillong ha ka 10 tarik, Nailar, 2024.