Shillong, Naiwieng 09 : U Working President ka United Democratic Party (UPD) u ba dei ruh u CEM barim ka KHADC, Bah Titos W Chyne u la ïaroh ïa kane ka samoi treikam kaba mynta jong ka KHADC (KHADC 2019) kaba la thaw histori da ka jinglah ban ïoh jingmynjur bun tylli ki ain kiba kongsan.
“Nga kwah ban ai khublei ïa kane ka samoi ba mynta kaba mynta namar ba ka la thaw ïa ka histori ban thaw bun tylli ki aiñ-rew (Bill) bad ïoh ruh ïa ka muhor na u Lat ka Jylla ba kin treikam kum ki aiñ na ka bynta ka jingmyntoi jong ka thaiñ bad ka Jaidbynriew hi baroh kawei,” u la ong haba kren bad ki lad pathai khubor.
U la pynkynmaw ruh ba ka jingthaw ïa ki aiñ kadei namar ka por ba ma u, u dang ïalam ïa ka Executive Committee kum u CEM bad kane ka dang ïai bteng wat ha ka por ka jingïalam jong u Bah Pynïaid Sing Syiem kum u CEM.
Ha kajuh ka por u Bah Titos u la pynpaw ruh ïa ka jingsngew kmen ba ka UDP ka la ïoh ban ïalam ïa ka Executive Committee na ka bynta lai snem shiteng kata naduh u snem 2019 – 2023 ha shwa ba ka NPP hapoh ka jingïalam jong u Bah Pynïaid kan shimti ïa ka EC bathymmai.
“Ki katto katne ki Bill kiba la mynjur ha ka samoi jong nga ki kynthup ïa ka Land Act, ka Solid Waste Management, ka Village & Town Development Council, ka jingpynkylla ïa ka Market Act bad kiwei kiwei,” bynrap biang u Bah Titos.
Shuh shuh u ong ruh ba 6 tylli ki Bill, kiba u Lat ka Jylla ula ai jingmynjur dang shen, kiba bun ki dei ki Amendment Bill.
