Thaw rekod ka Meghalaya ha ka jingbun palat ki skul bad ki nonghikai napdeng ki jylla ha NE

Shillong, K’Lyngkot 22 : Ka Meghalaya ka la dei ka jylla kaba bun tam eh ki skul bad ki nonghikai lada nujor bad ki san tylli kiwei pat ki jylla jong ka thaiñ shatei lam-mihngi jong ka ri lada ïaid ïaid katkum ka khanasamari jong u snem 2011.
Katkum ka jingïathuh da u Myntri Rangbah ka Jylla, Conrad K Sangma ha kane ka sngi Balang, la ïathuh ba ka jylla kaba don 29,66,889 ngut ki nongshong shnong, ka don pat 14,582 tylli ki skul bad haduh 55,160 ngut ki nonghikai. Na kine haduh 7,783 tylli ki dei ki skul sorkar bad 4172 tylli pat ki skul ba kyrshan da ka sorkar lane Grant In Aid (GIA) schools.
Lada nujor bad ka Tripura kaba don 36.73 lak ngut ki nongshong shnong, ka don tang 4929 tylli ki skul bad 36,433 ngut ki nonghikai. Na kine 4262 ki dei ki skul sorkar bad tang 43 tylli pat ki skul ba ïoh jingïarap na ka sorkar.
Ka Manipur kaba don 25.70 lak ngut ki nongshong shnong ka don 4617 tylli ki skul bad 42,684 ngut ki nonghikai. Na kine 2889 tylli ki dei ki skul sorkar bad tang 583 tylli ki skul ba ïoh jingïarap na ka sorkar.
Nangta ka Nagaland kaba don 19.78 lak ngut ki nongshong shnong ka don tang 2718 tylli ki skul bad 31,402 ngut ki nonghikai. Na kine 1960 tylli ki dei ki skul sorkar bad ym don satia ki skul ba kyrshan da ka sorkar.
Ha Arunachal Pradesh kaba don 13.83 lak ngut ki nongshong shnong ka don 3603 tylli ki skul bad 23,707 ngut ki nonghikai. Na kine 2985 tylli ki dei ki skul sorkar bad 68 tylli ki skul ba kyrshan da ka sorkar.
Katba ha Mizoram kaba don 10.97 lak ngut ki nongshong shnong ka don 3911 tylli ki skul bad 23,366 ngut ki nonghikai. Na kine 2563 tylli dei ki skul sorkar bad tang 230 tylli ki skul ba kyrshan da ka sorkar.
Nangta, u la ïathuh ruh ba na kitei ki 14,582 tylli ki skul, haduh 206 tylli ki dei ki skul kiba ym don satia ki khynnah ba wan skul lane ‘0 enrolment’.
U la ïathuh ruh ba ki don haduh 2,269 tylli ki skul kiba don tang hapoh 10ngut ki khynnah skul (single digit enrolment).
Ha ki skul Deficit bad Adhoc, u Myntri Rangbah u la pyntip ruh ba ki don haduh 18 tylli ki skul kiba ym don khynnah skul. Nangta pat haduh 1141 tylli ki skul kiba don tang hapoh 10 ngut ki khynnah skul.
Haba phai pat sha ki skul SSA, la ïathuh ba ki don haduh 30 tylli ki skul kiba ym don khynnah bad haduh 268 tylli ki skul kiba don hapoh 10 ngut.
Nangta ha ki skul sorkar pat, la ïathuh ba ki don haduh 11 tylli ki skul kiba ym don khynnah skul bad haduh 132 tylli pat ki skul kiba don tang hapoh 10 ngut ki khynnah skul.
Haba kren bad ki lad pathai khubor halor kane ka jingbun ki skul bad ki nonghikai ha ka jylla lada nujor bad kiwei kiwei ki jylla ka thain shatei lam mihngi jong ka ri, u Myntri Rangbah u ong ba kane kadei kaba la don naduh mynshwa bad kumta ka shem jingeh ïa u ban ong ei ei.
“Kumba phi ïohi ki don palat 4hajar tylli ki skul ba ïoh jingïarap na ka sorkar da ki klur klur tyngka. Kine ki jingtip ki dei ki jingshisha ba haduh katno ngi pynlut na ka bynta ka pule puthi,” ong u Myntri Rangbah.
Nangta u ong ruh ba um don ban ong ei ei halor ka jingbun ki skul namar kane ka lah ban dei ka jingbha lada bun ki skul bad ki nonghikai hynrei kaba kongsan pat kadei halor ka jinghikai kaba kumno ki khynnah ki ïoh.