Nongpoh, Naitung, 30: Ka Raid Marwet kaba hap hapoh ka Hima Mylliem, ha Ri Bhoi District kaba la thaw ïa kawei ka komiti ha ka 7 tarik mynta u bnai ha ka Sngi Saitjaiñ ka la leit ban ïa kynduh ïa u Syiem Raid jogn ka Raid Marwet ban pan ïa ka jingithuh bad ka jingkyrkhu kyrdoh ba ka komiti kan dup lah ban ai jingshakri na ka bynta ka bha ka miat bad ban ïada ïa la u pud u sam hapoh ka Raid Marwet.
Ïa kane ka Komiti la suit la shor kyrteng kum ka Raid Marwet Development and Social Welfare Committee (RMDSWC) bad kaba lyngba kane ka komiti ki paidbah nongshong shnong jong ka Raid Marwet ki la shim ïa ka rai ban ïatreilang na ka bynta ban kyntiew ïa ka bha ka miat bad ka roi ka par jong ki paidbah hapoh ka Raid Marwet.
Ki nongïalam jong kane ka komiti ki kynthup u Bah Munu Shakwa kum u President, u Bah Liam Pator kum u General Secretary, u Bah Dominic Lyngdoh bad u Nicholas Manar kum ki Treasurer bad kiwei kiwei ki dkhot ba la jied na ki paidbah nongshong shnong jong ka Raid Marwet.
Ha ka jingpynithuh ïa kane ka komiti, na ka liang jong u Syiem Raid ka Raid Marwet, u Paiem Ken Syiem u la ai ka jingkyrkhu kyrdoh bad ka jingbit ba kane ka komiti kan trei bad kan ai jingshakri na ka bynta ka bha ka miat hapoh ka Raid Marwet bad khamtam ban ai ka jingïatreilang bad ki bor synshar ka Raid khnang ba kane ka Raid kan dang kiew shaphrang ha baroh ki liang.
Ha ka jingïakren bad u President u Bah Monu Shakhwa bad u Secretary u Bah Liam Pator ki la ïathuh ba ka daw kaba ki khun ki hajar ka Raid Marwet ha ka jingïalam jong u Pa’iem Ken Syiem kum u Syiem Raid ki la thaw ïa kane ka komiti ka long ban peit kyrpang ïa ka bha ka miat bad ka roi ka par jong ki shnong bapher bapher ba hap hapoh kane ka Raid.
Ki la ong ruh ba kane ka komiti kan peit kyrpang ruh na ka bynta ka bha ka mait jong ki khynnah hapoh ka Raid ba kin lait na ki jingsniew bapher bapher kiba ktah ïa ka shongsuk shongsaiñ ki paidbah nongshong shnong.
Nalor ki jingshakri kiba bun ban wanrah ïa ka bha ka miat hapoh ka Raid, kane ka komiti kan peit kyrpang ruh ïa u pud u sam jong ka Raid, namar la jan bun na ki shnong kiba don hapoh ka jylli jong ka Raid Marwet ki don ha syndah bad ka jylla Assam.
Ki la pynpaw ruh ba kin ai jingshakri ryngkat ka jingïatrei lang bad ka ophis jong u Syiem Raid bad ka thong kaba hakhmat eh hi ka long ban kyntiew ïa ka bha ka miat, ka ïoh ka kot bad ka roi ka par jong ki paidbah hapoh ka Raid Marwet.
