Thaw ka sorkar da ka TFC ban bud dien bad bishar bniah ïa ka umdih ba pynpoi sha ki thliew ïing

Shillong, Naiwieng 1 : Ka tnad kaba peit ïa ka umdih umbam ka Public Health Engineering (PHE) ka la thaw da ka Task Force Committee (TFC) na ka bynta ban bud dien bad bishar bniah ïa ka umdih ba pynpoi sha man la ki thliew ïing hangne ha nongbah Shillong.
“ Nga sngewkmen shi katdei eh ban pynbna ba ka tnad PHE ka la thaw da ka TFC ban bud dien bad bishar bniah ïa ka umdih ba pynpoi sha man la ki thliew ïing hangne ha nongbah Shillong. Kane ka Committee kan bishar bniah shaphang ka jinglong jingman ka umdih bad kan pynthikna ba ka um ba pynpoi sha ki thliew ïing ka dei kaba khuid bad bit ban dih” ong u Myntri ka tnad PHE u Marcuise N Marak haba ïakren bad ki nongthoh khubor mynta ka sngi. U la ïathuh ïa kane ka TFC yn sa ïalam da u Chief Engineer ka PHE hi.
U Marak u la ïathuh ka kamram jong kane ka TFC ka long ban bud dien bad bishar bniah ïa ka umdih bad khamtam ban peit thuh haba don kino kino ki jingujor kiba ïadei bad ka umdih ba pynpoi na GSWSS I bad II sha kane ka nongbah.Ka dei kane ka committee ka ban lum nuksa ïa ka umdih ban phah eksamin na ka por sha ka por ban tip la ka biang ne em ba ki paidbah kin dih. Nalor kata dei ruh kane ka committee ka ban peit ïa ka rukom khleh dawai ïa ka um ha ka jaka pyllang um Water Treatment Plant kat kum ka CPHEO Manual.
U la ïathuh ïa kane ka rai ban thung ïa ka TFC la leh hadien ba la ïoh ki jingujor bad jingkynnoh ba ka um ba pynpoi da ka tnad PHE kam long kaba bit ban dih namar ka jur palat ka jingkhleh dawai.
“ Ym shym la buh por ruh ïa kane ka Committee namar ki hap ban peit thuh ïa ka umdih na ka por sha ka por tad haduh ban da pynmih hukum da kumwei pat” ong u Myntri.
Kane ka Committee kan leit ruh sha man la ki dong ki shnong ban peit thuh bad bishar bniah ïa ka umdih ba pynpoi sha ki thliew ïing ki briew. Namar kat kum ka kaiphod ba la pynmih dang shen ba la lap da ka Food Safety and Standards Authority of India (FSSAI) ka um ka long kaba jur sa tang ki dawai bad ka bym bit ban dih da ki briew.
Ia kane ka kaiphod na ka State Food Laboratory Commissionerate of Food Safety Pasteur Hills la aiti da ka FKJGP sha u Myntri Rangbah ka jylla u Conrad K Sangma ha ka 3 tarik Risaw khnang ba un leh kloi ïa kaba donkam ban ïada ïa ki paid nongshong shnong ka nongbah Shillong na ka jingma jong kane ka um ba jaboh.