Thaw ka sorkar da ka Committee ban bishar ïa ki jingdawa ki Tourist Taxi hapoh ka jylla

Shillong, Nailur 25 : Ka Sorkar Jylla kala thaw da ka Committee ka ban khmih ïa ki kam kiba ïadei bad ki kali tourist ba kamai hapoh ka Jylla.
Haba pyntip ïa kane mynta ka sngi Balang, u Myntri Rangbah Conrad K Sangma ula ong “Nga la bthah ïa u Director ka Tourism ban thaw ïa ka Committee kaba rit….ba kan bishar ïa ki jingdawa ki kali tourist taxi bad ai jingtip ba haduh katno ka ktah ïa ki kali tourist, kiei ki jingai jingmut bad ki lynti ban pynbeit kiba don hakhmat jong ngi, katno tylli ki kali tourist ki don bad katno tylli ki kali torist ki wan na shabar”.
Ka Committee kan don ïa ki dkhot napoh ka tnad Tourism, Law, Police, District Administration bad kiwei kiwei ki Tnad nalor ki kynhun kiba don bynta lang ha ka kam.
“Ngi kwah ban wanrah ïa ka rai, shisien ba ngi la lah ban ïoh jingkheiñ ïa ka jinglong jingman ha ka lynti kaba bniah bha bad yn ailad kumjuh ïa baroh ki kynhun ba kin pynpaw ïa ki jingsngewkhia halor kane ka kam” ula ong.
U Conrad ula pynpaw “Kumba nga ong, ka long kaba donkam ba ki taxi association bad ki nongñiah dalade, kin ïadonlang ban ïakren bad ki, ban tip kiei ki jingeh, kiei ki jingtyrwa, kiei ki lynti ba ngi don hakhmat, kaei ka sienjam ba ngi lah ban shim, kaei ka ban jia lada ngi shim ïa kine ki sienjam bad kiwei kiwei”.
“Nga kyrmen ba ka Committee u Director kan sa ïakynduh noh shen bad kan sa ai ïa ka kaiphod kham kloi sha ngi bad shuwa kane, ngan sa khot ïa ki kynhun bapher bapher ban ïakren bad ngin peit ïa kaei ka lynti ba ngin lah ban shim” ula ong.