Shillong, Rymphang 20: U Director of School Education & Literacy Swapnil Tembe ha ka sngi Palei u la ong ba ka la don ka committee kaba kyrpang hapoh ka DSEL ban pynthikna ba kan don ka jingsiew thikna ïa ka tulop ha baroh ki skul.
`Haba kren sha ki lad pathai khubor u Tembe u la ong ba kane ka committee kan shong ka jingïalang manla ka bnai ban bishar ha kaba ïadei bad ka jingpyllait ïa ka tulop sha baroh ki skul.
U la pyntip ba ha kaba ïadei bad ki skul sorkar ha baroh ki kyrdan ka sorkar ka la dep ban pyllait ïa ka tulop haduh u bnai Kyllalyngkot.
“Haoid don ki por ba ngi mad ïa ki jingeh khamtam ha kaba ïadei bad ki kam teknikal. Ki don ruh ki kam pisa (financial systems) kiba la leh da ka online bad namar ki don ki kam kiba hap ban pynbeit, don ruh ka jingpynkylla ha ki DDO (drawing and disbursing officer). Ki don ruh ki kam kiba bun jait kiba ngi hap ban mad bad dei halor kane ba ki lah ban don ki skul ki bym ïoh ïa ki tulop ha ka por kaba biang. Hynrei ka nongrim hi kadei bad ngi shait bishar kam manla ka bnai ha kaba ïadei bad ka kam ban siew ïa ki tulop. Ngi ju shong ka jingïalang manla ka taïew kaba nyngkong bad ngi khmmih bniah bad ha ka jingshisha ngi ju pyllait ha shwa ka por. Ha u snem ba la dep kam shym don satia kano kano ka jingeh ha kaba ïadei bad kane ka kam siew tulop,” ong u director.
Ha kaba ïadei bad ki skul pat kiba ïoh jingïarap na ka sorkar, u Tembe u la ong ba ka jingpyllait ïa ka pisa ka long ha ki lai bnai da kaba bynrap ba ka sorkar ka la dep ban pyllait ïa ka pisa haduh u bnai Nohprah.
“Na ka bynta kane ka laibnai kaba mynta, kaba dei kaba khatduh ngi dang trei ïa ka kam bad ïa kane ngi shim ba kan dei la ka jong ka bynta,” u la bynrap.
